28 декабря 2010 г.
Нумаях пулмасть район администрацийĕн пĕчĕк залĕнче çамрăксен форумĕ иртнĕ. Ку мероприятие район администрацийĕн пуçлăхĕ Ю.Васильев, вĕрентÿ тата çамрăксен политикин, халăха социаллă хÿтлĕх паракан пайсен пуçлăхĕсем В.Шакровпа Л.Аввакумова, çынсене ĕçе вырнаçтаракан районти центрăн ертÿçи Л.Кузьмина, РФ пенси фончĕн районти управленийĕн начальникĕн çумĕ Л.Иванова, строительствăпа çул-йĕр тата коммуналлă хуçалăх пайĕн тĕп специалисчĕ М.Степанов хутшăннă.
“Пурăнакан вырăн” тĕллевлĕ федераллă программăн “Çамрăк çемьесене пурăнмалли вырăнпа тивĕçтересси” пайне мĕнле пурнăçа кĕртни, тин йĕркеленнĕ кил-йышăн социаллă гарантийĕ, ĕçсĕр каччăсемпе хĕрсене пулăшасси, амăшĕн капиталĕ çинчен калаçнă форумра.
Район администрацийĕн пуçлăхĕ Ю.Васильев пĕтĕмлетÿ тунă. “Пирĕн çамрăксем яланах активлăхпа палăрнă. Хăюллă проектсене пурнăçа кĕртме хутшăнни каччăсемпе хĕрсене чăн-чăн профессионалсем, хисепе тивĕçлĕ граждансем пулма пулăшать. Хăвăр тĕллевĕрсене пурнăçланă чухне вĕçне çитиччен нихăçан та каялла ан чакăр. Сывлăхлă, юратуллă, телейлĕ пулăр”, – тенĕ Юрий Егорович.
Унтан вăл ĕçлекен çамрăксене район администрацийĕн пуçлăхĕн премисене панă. Çак пысăк чыса “Акконд–агро фирма” обществăри А.Афанасьев механизаторпа А. Птичкин водитель, К.Иванова (Тăрмăш), О.Кириллова (Йăнтăрчă), А.Краснова (Çĕнĕ Пуянкасси) вĕрентекенсем, Тушкил ял тăрăхĕнчи ĕçлекен çамрăксен координаци совечĕн членĕ О.Максимова, Тĕмерти ача сачĕн воспитателĕ Т.Манишева, район администрацийĕнчи финанс пайĕн тĕп бухгалтерĕ Н.Суркина, Тăвайри тĕп больница врачĕ В.Чумышева тивĕçлĕ пулнă.
Источник: "Ял ĕçченĕ"