24 сентября 2010 г.
Шкул çулне çитмен ачасен районти вĕренÿ системи паянхи кун 9 садике тата ачасене кĕске вăхăтлăха йышăнмалли 4 ушкăна (Чутейри, Тушкилти тата Элпуçĕнчи вăтам шкулсенче) пĕрлештерсе тăрать. Июнĕн 1-мĕшĕ тĕлне вĕсене 626 ача (61, 2 проц.) çÿренĕ. Шкул çулне çитмен ачасен вĕренÿ системи аталанасси демографи процесĕпе çыхăннă, юлашки çав ĕç çине тÿрремĕнех витĕм кÿрет. Юлашки çулсенче ашшĕ-амăшĕ ачисене садиксенче вĕрентесшĕн пулни палăрать. Çавăн пек вĕренÿ учрежденийĕсене çÿрекен ачасем ăс-тăн, сывлăх тĕлĕшĕнчен çирĕпрех аталанаççĕ, вĕсен тавра курăмĕ анлăрах, апла пулсан шкулта ĕлкĕрсе пыраслăх та ÿсет. Хальхи вăхăтра садиксем çитмеççĕ, 284 ача черет кĕтет.
Шкул çулне çитмен ачасен вĕренÿ системи умĕнче вĕрентÿ пахалăхне лайăхлатас, çав ĕçре çĕнĕлĕхсемпе усă курас, пахалăхлă пĕлÿпе воспитани илме пурне те тан условисем туса парас, малашлăха шута илсе аталантарас тĕллевсем тăраççĕ. Район ку тĕлĕшпе 2006–2010 çулсемшĕн ятарлă программа йышăннă пулнă. Ачасем садиксенче вăй-хал, ăс-тăн, эстетика, культура, экологи воспитанийĕ илеççĕ. Унсăр пуçне воспитани ĕçне ашшĕ-амăшне те ытларах явăçтарма тăрăшатпăр. Вĕрентÿпе воспитани ĕçĕнче ку чухнехи комплекслă çĕнĕ программăсемпе усă кураççĕ. Çакă вара ачасене вĕрентес, аталантарас ĕçе татти-сыпписĕр туса пыма май парать. Ку чухнехи аудио-видеотехника хатĕрĕсемпе усă курса занятисене чылай кăсăклă, çÿллĕрех шайра ирттерме майсем пур. Çав вăхăтрах хăш-пĕр чăрмавсене те шута илме тивет. Садик ÿсĕмĕнчи ачасен хисепĕ пысăк, çав вăхăтрах вĕсенчи условисем нормăсене аран тенĕ пек тивĕçтереççĕ, пурлăхпа техника бази çителĕксĕр. Ачасем валли спорт тата музыка залĕсем уйрăмшар çук, вĕсене пĕрлештерме тивет.
Садиксенче ачасене хушма вĕренĕве явăçтарма тăрăшаççĕ, çав тĕллевпе тĕрлĕ кружоксем йĕркелеççĕ. Çапла 13 кружокра 156 ача хăйĕн пултарулăхне аталантарать.
Шкул çулĕнчи мар ачасен вĕренÿ учрежденийĕсем пĕтĕмĕшле пĕлÿ паракан шкулсемпе, ашшĕ-амăшĕпе, сывлăх учрежденийĕсемпе тачă çыхăнса ĕçлеме тăрăшаççĕ. Ачасен сывлăхне упрассине, ăна çирĕплетессине куллен тимлĕхре тытаççĕ. “Сывлăхлă пулма – ача садне” районти конкурс та çавнах çирĕплетет. Садиксенче ачасене пĕчĕкрен хăрушсăрлăх йĕркисемпе паллаштараççĕ. Ку енĕпе ятарлă кĕтессем, методика хатĕрĕсем тунă, ĕç планĕсем пур. Çуллен “Пĕчĕк çеç светофор” конкурс ирттеретпĕр. Вăй-хал аталанăвĕн занятийĕсемсĕр пуçне спорт уявĕсемпе ăмăртусем, конкурссем, сывлăх кунĕсем, физкульттăхтавсем пулаççĕ. Ачасем хăйсен пултарулăхне мини-олимпиадăсенче, тĕрлĕ конкурссенче кăтартса параççĕ, астуса юлма, шухăшлама вĕренеççĕ. Вĕрентÿпе воспитани ĕçне 51 педагог, çав шутра 9 заведующи, 35 воспитатель, музыка ертÿçисем çиччĕн хутшăнаççĕ "пĕтĕмпе – 132 работник". Методика ĕçĕ лайăхланса пырать. Ку вара професси ăсталăхне ÿстерме, коллективсен пултарулăх вăй-хăватне аталантарма пулăшать.
Садиксенче чăннипех пултаруллă, ырă чун-чĕреллĕ воспитательсем, апата тутлă хатĕрлеме пĕлекен поварсем, ачасен сывлăхĕшĕн тăрăшакан медсестрасем ĕçлеççĕ. Коллектива унпа ялан канашлакан, умри тивĕçне лайăх чухлакан, хăйне шанса тăракан заведующи ертсе пырать. Вăл çÿллĕ шайра пулсан, ачасемпе ашшĕ-амăшĕн те, педагогсен те чунра ăшă та çутă, ырă та хăтлă. Çавăн пек ырă çынсен халĕ хăйсен професси уявĕ – шкул çулне çитмен ачасемпе ĕçлекенсен кунĕ пур. Ача садикре хăйне хаваслă та телейлĕ туясси сирĕн ăсталăхран нумай килет. Уявпа сире, чун ăшшине куллен пĕчĕк çынсене, çĕр-шывăн пулас гражданĕсене парнелекенсем!
Источник: "Ял ĕçченĕ"