27 июля 2010 г.
Шкул ачисен çуллахи канăвĕ малалла пырать. Хаваслă вăхăт. Тем тумалăх та пур. Чылайăшĕ тĕрлĕрен лагерьсенче канса сывлăхне çирĕплетет. Хăшĕсем тата хулари тăванĕсем патĕнче хăналанаççĕ. Виççĕмĕшĕсемшĕн килте те питĕ аван. Ирсерен шкула утмалла мар. Уроксем хатĕрлесе пуçа ыраттармастăн. Мĕн чухлĕ çывăрас тетĕн – çывăр.. Урамра йытă хăваласа чупма та, велосипедпа ярăнма та, шыва кĕрсе чун каниччен киленме те, тус-юлташпа выляса савăнма та майсем çителĕклĕ. Килти ĕçсенчен пушансан, выляса-кулса ывăнсан вара библиотекăна çул тытма та юрать. Ара, кĕнеке, хаçат-журнал вулани те кăмăла тултарать-çке-ха. Чун апачĕсĕр те пурăнма кичем.
Ураскассипе Çĕнçырма ачисем те библиотека уçасса кĕтсе тăраççĕ. Кунсерен çÿреме те хапăлах вĕсем. В.Григорьева библиотекарь ялванах тарават кĕтсе илет çамрăк вулакансене. Çĕнĕ кĕнекесемпе паллаштарать, хаçат-журнал вулама сĕнет. Алла Яковлева, Инесса Петрова, Анжелăпа Оля Никифоровасем, Лена Антонова, Толя Гаврилов, икĕ Оля – Моисеевапа Федорова, Саша Кабаков, Алеша Иварбеев – вулавăшăн чун-чăн тусĕсем.
Эпĕ унта пулнă кун та темиçе ача хĕрсех кĕнеке суйлатчĕ. А.Яковлева Юхма Мишшин “Вăрман кĕнеки” ятлине, И.Петрова Ăсан Уçăпĕ çырнă “Вăйăран вăкăр” кĕнекине илсе вулама кăмăл турĕç. Хуларан ялти тăванĕсем патĕнче канакан ачасем те килсех тăраççĕ ялти библиотекăна. Акă, Диана Евграфова Ф.Келли çырнă детектив кĕнекине суйласа илнĕ. Даша Зайцева вара художниксем çинчен вулама кăмăллать. Иваново хулинче вĕренет вăл, художник-стилист профессине алла илесшĕн. К.Григорьевпа А.Григорьев та студентсем. Вĕсене те хăйсен пулас профессийĕпе çыхăннă кĕнекесем ытларах интереслентереççĕ. Тĕрлĕрен справочниксемпе, энциклопедисемпе те кăсăкланаççĕ каччăсем. Ирина Григорьева аллинче харăсах икĕ кĕнеке. 10-мĕш класа куçнă хĕрача чăваш тата вырăс литературипе вĕрентекенсем вулама сĕннĕ произведенисене суйланă. И.Бунин калавĕсене тата К.В.Иванов çырнисен пуххине вуласшăн вăл çывăх кунсенче.
Çапла, çулла та такăрлатсах тăраççĕ вулавăш сукмакне чăн-чăн кĕнеке тусĕсем. Çакăнта, паллах, унăн хуçин – Валентина Михайловнан тÿпи те пĕчĕк мар. Хăйĕн ĕçне чунтан парăнса, юратса ĕçленĕренпех ĕнтĕ библиотекăна çÿрекенсен йышĕ иксĕлмест. Малашне те çаплах пултăрччĕ.
Источник: "Ял ĕçченĕ"