13 августа 2010 г.
Николай Петрович Степанов Йăнтăрчăри вăтам шкулти физкультура вĕрентет, ĕç стажĕ 32 çул, çав шутра 20 çул пĕр улшăнмасăр – Йăнтăрчăри вăтам шкулта. Канашри педагогика училищин кăнтăрлахи уйрăмĕнчен тата ĕçрен татăлмасăр 1986 çулта заочнăй йĕркепе Ульяновскри педагогика институчĕн физкультура уйрăмĕнчен вĕренсе тухнă. РФ вĕрентÿ ĕçĕн отличникĕ, I категорири учитель. Ăна ялти (вăл хăй Тăрмăшран) е çывăхарах шкула куçма та май пулнă, анчах Николай Петрович хăнăхнă коллектива, ачасене хăварма пултарайман.
Паянхи кун вăй питти арçынна физкультура учителĕнче ĕçленине сайра тĕл пулатăн. Мĕншĕн тесен ĕç укçи пĕчĕк. Анчах Николай Петрович хăйĕн профессине, хăнăхнă коллектива чунтан парăннă çын. 4–5 çул каялла вăл районта пуçласа хăвăрт утакансен секцине йĕркелесе ячĕ. Ун патĕнче ăсталăха тĕрлĕ ÿсĕмри ачасем ÿстереççĕ, 3–4 классенчен пуçласах. Занятисем эрнере 3 хутчен, тепĕр чухне 4 та пулаççĕ. 14 ача çÿрет. Пĕр-ик çултанах результатсем сисĕнме пуçларĕç. Унăн воспитанникĕсем Марина Германова (Улянкă), Людмила Николаева (Тенеялĕ), Настя Конова (Йăнтăрчă), Элла Данилова, Диана Иванова, Вера Матвеева иртнĕ çул республикăри ăмăртусенче тÿрех палăрчĕç, харпăр хăй ÿсĕмĕнче вăйлисен йышне кĕчĕç. М.Германовапа Л.Николаевана олимп резервĕн шкулĕн воспитанникĕсемпе пĕрле хатĕрленме те илнĕччĕ. Л.Николаеван пысăк малашлăхчĕ, ăна Раççей шайĕнчи ăмăртусене те хатĕрлесшĕнччĕ, анчах хĕрача пăрахса килчĕ.
Пирĕн районта хăвăрт утасси ытти шкулсенче сарăлман. Вăл вара малашлăхлă специализаци, мĕншĕн тесен Шупашкарта Пĕтĕм Раççейри тата Европа шайĕнчи ăмăртусем иртеççĕ. Условисем чаплах мар пулин те, Йăнтăрчă шкулĕнче асфальт сарнă утмалли-чупмалли дорожка пур. Паллах, Тăвайри мар, çавах та çукки мар. Хĕллехи вăхăтра уйрăмах йывăр, коридорта утма тивет. Транспорт уйăрса парайманнипе хăвăрт утакансем кăçал хăш-пĕр ăмăртусенчен айккинче тăрса юлчĕç.
Николай Петрович хăй ĕçлеме пуçланăранпах çăмăл атлетикăна тата волейбола тимлĕх уйăрать. Шкулта çуркунне çуллен кросс чупассипе уçă ăмăртусем пулаççĕ. Малтанхи вăхăтра ăна Тăрмăш, Нăрваш, Мучар, Тăвай шкулĕсем тата вăрмарсем те хутшăнатчĕç. Кросс трасси те чылай кăткăс, çырмасем тăрăх иртет. Çав ăмăртусене ирттерме тытăннăранпа кăçал 20 çул çитрĕ (шăпах Н.Степанов ĕçлеме тытăннă çулран). Ку спорт уявне пуянкассисемпе эльпуçсем хутшăнчĕç.
Унăн воспитанникĕсем волейбол енĕпе район чысне хÿтĕлеççĕ. Кире пуканĕ çĕклессипе А.Пимулин парнисемшĕн пынă турнирта тата вĕренекенсен республикăри Спартакиадинче малти вырăнсем йышăнаççĕ.
Николай Степанов – районти чи пултаруллă вĕрентекенсенчен пĕри. Вăл ытти секцисем те йĕркеленĕ пулĕччĕ, анчах киле инçене çÿремелле пирки вăхăчĕ çитмест.
Вăл хăй волейболла, шашкăлла выляма, çуран чупма юратать.
Источник: "Ял ĕçченĕ"