17 августа 2010 г.
Районти ятарлă комисси пĕтĕмĕшле пĕлÿ паракан шкулсем çĕнĕ вĕренÿ çулне мĕнле хатĕрленнине тишкерсе тухрĕ. Шкул ертÿçисем хăйсен коллективĕсемпе чылай ĕç тунă.
Комисси членĕсем Тăвай шкулĕн директорĕн ĕçĕсене туса пыракан С.В.Николаева уйрăмах хастар пулнине палăртрĕç. Вăл кĕске вăхăтрах хими кабинетĕнче учитель тата кашни вĕренекенĕн ĕç вырăнне пăрăхсем выранаçтарса шывпа тивĕçтермелле тутарма пултарчĕ, ăшăтакан батарейăсене решеткесемпе хуплаттарчĕ. Çавăн пекех Роспотребнадзор специалисчĕсем асăрхаттарнисене пахалăхлă пурнăçланă.
Тушкил шкулĕн ертÿçине В.А.Егорова та ырăпа асăнчĕç комисси членĕсем. Асăрхаттармалли сăлтавсем те тупăнсах каймарĕç кунта. Çак шкулта халĕ спортзала тĕпрен юсас ĕçсем пыраççĕ. Çитес кунсенче вĕçлеме палăртнă.
Йăнтăрчă шкулĕнче (директорĕ В.И.Егоров) спорт залĕнче автоматла пушар сигнализацийĕ вырнаçтарнă, класри доскасем çине сафитсем (çутатмалли приборсем) çакнă, апат хатĕрлемелли пÿлĕмпе, физика, хими кабинечĕсене вĕри шывпа тивĕçтернĕ.
Çак ĕçсене Тăрмăшри, Çĕнĕ Пуянкассинчи, Тĕмерти, Чутейри, Енĕш Нăрвашри, Мучарти вăтам шкулсен директорĕсем М.М.Андреев, С.П.Кириллов, А.А.Николаева, Н.В.Большов, О.В.Ярмулин, В.И.Смирнова отпуска кайма васкамасăрах тивĕçлĕ пурнăçларĕç. Вĕсем хăйсен яваплăхне туйса ачасене вĕренÿ процесĕсенче хăрушсăрлăхлă условисем туса пама куллен тăрăшаççĕ. Шкулсенче ытти юсав ĕçĕсене туса ирттернĕ: сĕтел-пукана, пÿлĕмсенчи стенасемпе урайсене сăрласа çĕнетнĕ.
Эльпуç шкулĕн директорĕ Л.А.Кабакова вара учительсемпе, техслужащисемпе кивĕ шкула çĕнĕ вĕренÿ çулне хатĕрлесе çитерчĕ. Çав вăхăтрах вăл çĕнĕ шкул тунă çĕрте те кашни кун тенĕ пек пулать, ĕçсемпе интересленет.
Комисси районти пур шкула та çĕнĕ вĕренÿ çулне пуçлама ирĕк панă.
Источник: "Ял ĕçченĕ"