03 сентября 2010 г.
Юмах тĕнчине лекнĕн туятăн çак кил картине кĕрсен. Хуралтă стенисене тĕрлĕ сăнарсем ÿкерсе илемлетнĕ, тункатасем çинче чечексем ешереççĕ, çырма урлă – кĕпер. Çырмине вара çатан тытса çирĕплетнĕ. Тĕрлĕ пластик савăтсенчен чечексем касса кăларнă, вĕсене илемлĕ вырнаçтарнă. Кунтах кивĕ мечĕкрен ăсталанă шăна кăмписем те ÿсеççĕ. Çавнашкал илемлĕ кил хуçалăхра Валерий Васильевичпа Татьяна Геннадьевна Яковлевсем пурăнаççĕ. Тĕрлĕ чĕр чунсене ăсталаканĕ, чечекĕсене ÿстерекенĕ вара ылтăн алăллă, илеме туйма пултаракан кил хуçи хĕрарăмĕ. Вăл Тĕмерти вăтам шкулта ачасене технологи вĕрентет. Маларах вара Кармал шкулĕнче тăрăшнă. Алли-ури чăнах та ăста вара унăн. Çыхма, çĕлеме, тĕрлеме те пултарать. Краснодар енче çитĕннĕ вырăс хĕрĕ. Ачасене тăварлă чустаран тĕрлĕ теттесем тума вĕрентет, хăй вара хута çемçетсе тĕрлĕ панносем тăвать. Районти вĕрентекенсен конференцийĕнчи выставкăна вăл асăннă япаласене тăратрĕ. Пĕри тепринчен аванрах-çке ĕçсем. Вĕрентекенсем чылайччен сăнаса тăчĕç. Анса ларакан хĕвел çутинче асамлă йăлкăшаççĕ ĕçĕсем. Илемлĕх тĕнчине йыхăраççĕ тейĕн. Çак тĕнчере пурăнать те ĕнтĕ Татьяна Геннадьевна.
Хĕрарăмсен канашĕн ертÿçи пулнă май манăн районти çынсене те çак илемлĕ чунлă вĕрентекенпе паллаштарас килчĕ.
Источник: "Ял ĕçченĕ"