19 августа 2008 г.
Ачасен тавракурăмне ÿстерес, вĕренекенсен пурнăçне интереслĕ тăвас тесе Тăвайри вăтам шкулта чылай тăрăшаççĕ.
Кашни çулах шкул районти, республикăри мероприятисене хастар хутшăнать. Пĕлтĕр районта иртнĕ олимпиадăсенче малти вырăнсенчен 41 процент (85 çын) Тăвай шкулĕнче вĕренекенсем йышăнма пултарнă, пиллĕкĕшĕ республикăра мала тухнă. Вĕренекенсен пĕлĕвне ÿстерес тĕллевпе иккĕмĕш çул çуллахи каникул вăхăтĕнче шкулта профиль лагерĕ йĕркеленĕ. Кăçал вăл ĕçпе кану, сывлăха çирĕплетекен лагерьсем хыççăн августăн 1-мĕшĕнчен ĕçлеме пуçларĕ.
Лагерь начальникĕ Светлана Владиславовна Николаева ĕçе аван туса пырать. Пултаруллă 20 вĕренекен (9-11 классем) каникул вăхăтĕнче те шкула хаваспа çÿрет.
Вĕсем олимпиадăсене, ăслăлăхпа практика конференцийĕсене, конкурссене хатĕрленеççĕ. Ятарлă расписанипе иртеççĕ уроксем. Биологипе, акăлчан чĕлхипе, физикăпа, математикăпа, вырăс чĕлхипе тата литературипе, географипе, информатикăпа, правăпа, химипе, историпе А.П.Михайлова, Н.И.Гаврилова, Н.В.Михайлова, Л.В.Козлова, В.М.Кириллова, М.Е.Семенова вĕрентекенсем чунĕсене парса ĕçлеççĕ. Компьютерсемпе усă курса та, тестсемпе ыйтусем тăрăх та хатĕрленеççĕ.
Кадет класĕнче вĕренекен Таня Хадиатулина ĕçе йĕркелесе пыма пулăшать. Хăйсене кăсăклантаракан предметсемпе Катя Никитина (физикăпа), икĕ Оля - Волковапа Ильина (правăпа), Света Михайловапа Ирина Игнатьева (биологипе) тăрăшсах вĕренеççĕ.
Ирхине 8 сехетрен пуçласа 15 сехетчен ĕçлет лагерь. Унта çÿрекенсене 2 хутчен апатлантараççĕ. Вĕреннĕ хушăрах ачасем физкультминуткăсем тăваççĕ, юрăсем юрлаççĕ, канăва интереслĕ ирттереççĕ.
Вĕренекенсем те, ашшĕ-амăшĕ те кăмăллă çавăн пек лагерь йĕркеленĕшĕн. “Кашни çулах çÿреме хатĕр эпир кунта”, – теççĕ ачасем.
Источник: "Ял ĕçченĕ"