19 февраля 2014 г.
Афганистан çĕрĕ çинчен Совет Çарĕн чаçĕсене илсе тухнăранпа 25 çул çитрĕ.
Йăлана кĕнĕ йĕркепе асăннă кун район администрацийĕнче интернационалла тивĕçе пурнăçланисемпе тĕл пулчĕç. Афганистан вăрçин ветеранĕсен районти уйрăмĕн правлени председателĕ Валерий Иванов сăмах илчĕ. Вăл воин-интернационалистсем хамăрпа кÿршĕлле Афганистан çĕрĕ çинче хăйсен пурнăçне шеллемесĕр гражданла тата патриотла тивĕçе чыслăн пурнăçланине палăртрĕ. Паянхи куна тăван кĕтесре 62 воин-афганец пурăнать. Район администрацийĕн пуçлăхĕн социаллă ыйтусемпе ĕçлекен çумĕ Эдуард Николаев воин-интернационалистсене хăйсен тивĕçĕсене тÿрĕ кăмăлпа пурнăçланăшăн, ĕçре хастарлăхпа палăрнăшăн тав турĕ. ЧР Çар ĕç комиссариачĕн Муркаш тата Элĕк районĕсенчи пай начальникĕ Александр Кочуров юбилей медалĕпе чысларĕ. Вĕсене Георгий Ивановăн, Валерий Мошковăн, Владислав Петровăн кăкăрĕсем çине çакрĕ.
Ун хыççăн пухăннисем Элĕкри культурăпа кану паркĕнчи палăк умне чечексем хучĕç. Çитĕнекен ăрăва патриотла воспитани парас тĕллевпе афганецсем Элĕкри литературăпа краеведени музейне çитсе курчĕç.
Источник: "Пурнăç çулĕпе" Аликовская районная газета