04 октября 2016 г.
Шупашкарта 1999-2000 çулсенче çуралнă çамрăксем хушшинче самбо вăййипе кĕрешсе Чăваш Енре мала тухассишĕн ăмăртусем иртрĕç. Унтанах Федерацин Атăлçи округĕнчи ăмăртăвĕсене хутшăнма самбистсем суйласа илеççĕ.
"Аль" ФСК самбисчĕсем республикăри ăмăртусенче хăйсен пултарулăхне пĕрре çеç мар кăтартрĕç ĕнтĕ. Авăн уйăхĕнче Диана Федорова дзюдопа республикăра мала тухассишĕн пынă ăмăртура III вырăн йышăнчĕ. Егор Иванов та, иртнĕ çулхи çĕнтерỹçĕ тата дзюдопа ЧР пĕрлештернĕ командин членĕ, начар мар кĕрешрĕ.
Хальхинче Ухсай ячĕллĕ культура керменĕнче 10 виçе категорийĕнчи çĕнтерỹçĕсене палăртрĕç. Пирĕн командăри самбистсенчен Роман Лукин 87 килограмран пысăкрах виçере чи маттурри пулчĕ, çĕнтерỹçĕ тата Чăваш Республикин пĕрлештернĕ командин членĕ пулса тăчĕ. Халĕ вăл хушма тренировкăсене тата ăмăртусене хутшăнать. Ăна Федерацин Атăлçи округĕнчи ăмăртусенче те çĕнтерỹçĕ пулса тăрасса шанас килет.
Роман - тĕплĕ, тăрăшуллă çамрăк. Районти Кĕрешỹ вăйăра та пĕрремĕш вырăна çĕнсе илнĕччĕ. Сăмах майăн каласан, унăн ашшĕ те, Михаил Лукин, самбăпа республикăра мала тухассишĕн пынă ăмăртусенче иккĕмĕш вырăн йышăннă пулнă. Ывăлĕ вара ашшĕнчен те ăнăçлăрах кĕрешме пултарчĕ. Малашне те ăнăçусем сунатпăр ăна.
М.АНДРЕЕВ. Тренер.
Сăн ỹкерчĕкре: Р.Лукин хăйĕн тренерĕпе пĕрле.
Источник: "Ял ĕçченĕ"