09 августа 2016 г.
Валентина Павловна Никитина - Красноармейски хĕрĕ. Шупашкарти медицина училищинче шăл лартакан технолог профессине илнĕ, направленипе Тăвайри тĕп больницăна килнĕ. Унтанпа 34 çул хыçа юлчĕ ĕнтĕ. Çак хушăра миçе çынран тав сăмахĕ илтмен-ши вăл? Шăлсем çирĕп пулни сывлăх çинче палăрать, сăн-пит те, кулă та илемлĕ.
Пушă вăхăтра вара харсăр медсестра "Ял ĕçченĕ" хаçата тытать. Район хыпарçипе 28 çул ытла туслă вăл. Турă çырнипе, Алексей Павловичпа, Тăвайĕнче паллашнă. Çемьеллĕ пулса 2 хĕр пăхса ỹстернĕ, иккĕшне те аслă пĕлỹ илме пулăшнă. Халĕ виçĕ мăнукпа савăнаççĕ. Вĕсенчен йĕкĕрешсем те пур, пурте - хĕрачасем. Енĕш Нăрвашран Тăвайне ĕçе çỹреççĕ Никитинсем. Алексей Павлович та кунта водительте тăрăшать. Ялта кил хуçалăхĕ çирĕп вĕсен, тĕрлĕ выльăх, кайăк-кĕшĕк усраççĕ.
Ĕç кунĕ 7 сехет çурăра пуçланать. Çав вăхăтчен мăшăрĕпе килти ĕçсене туса хăварма ĕлкĕреççĕ.
Тухтăр патне килекен çынсене регистратурăра йышăнать кăнтăрлаччен, унтан шăл лартакан кабинета васкать. Анатолий Иванович Игнатьев врачпа нумайранпа пĕр-пĕрне ăнланса ĕçлеççĕ. Вăл та халăх хушшинче пысăк хисепре.
Сăн ỹкерчĕкре: Валентина Никитина ĕç вăхăтĕнче.
Е.ШИБАЛОВ сăн ỹкерчĕкĕ.
Источник: "Ял ĕçченĕ"