06 мая 2014 г.
Чăвашсене çутта кăларакан И.Я.Яковлев çуралнăранпа 166 çул çитнине тата чăваш чĕлхи кунне халалланă ятпа Енĕш Нăрвашри историпе мемориал халăх музейĕнче асра юлакан самант пулса иртрĕ. Музей умĕнчи пысăк чул çинчи мрамор плита çине И.Я.Яковлевăн кĕнеке тытса тăракан сăнарне вырнаçтарнă. Хăй вăхăтĕнче çак сăнарлă палăка А.П.Майраслов скульптор Яковлевăн тăван ялĕнче вырнаçтарма ĕмĕтленнĕ.
Ака уйăхĕн 25-мĕшĕнче Нăрвашра музей умне шкул ачисемпе учительсем, ял администрацийĕпе культура системинче ĕçлекенсем, Майраслов скульптор тăванĕсемпе ялти çынсем йышлăн пуçтарăнчĕç. Пухăннисем умĕнче музей заведующийĕ Владимир Петров И.Я.Яковлев Нăрваш шкулĕн историйĕнче тарăн йĕр хăварни çинчен каласа пачĕ. Аслă Вĕрентекенĕмĕр сăнарне калăпланă мрамор плитана уçнине пухăннисем тăвăллăн алă çупса йышăнчĕç. О.Ярмулин учитель культура çулталăкĕнче музейра иртекен пысăк пĕлтерĕшлĕ ĕçсем çинче чарăнса тăчĕ. Çавăн хыççăн вара пурте музейри "Яковлевăн мемориал класĕ" ятлă пỹлĕмре пулса тĕрлĕ экспонатсемпе паллашрĕç.
Е.КУЗНЕЦОВА, Енĕш Нăрвашри ИКЦ директорĕ.
Источник: "Ял ĕçченĕ"