25 декабря 2012 г.
“АККОНД” акционерсен уçă обществи хăйĕн лайăх кăтартăвĕсемпе пысăк пĕлтерĕшлĕ ĕçĕсене çирĕплетсе пынă май республикăри ялсенче фирма магазинĕсем уçать. Асăннă суту-илÿ çурчĕсем чылай çĕрте çынсене тивĕçтереççĕ халь, Вăрмар, Вăрнар, Элĕк, Сĕнтĕрвăрри, Çĕрпÿ тата ытти районсенче обществăн пысăк пахалăхлă канфет-печенийĕсемпе сĕт продукчĕсене сĕнеççĕ. “АККОНДăн” генеральнăй директорĕ, Чăваш Патшалăх Канашĕн депутачĕ Валерий Николаевич Иванов хăй çуралса ÿснĕ тăван районне парне хыççăн парне кÿрет. Тăвайри “Акконд-агро фирма” обществăпа сĕт ĕçлесе хатĕрлекен цехра чылай ĕç вырăнĕ тупăнчĕ çынсем валли. Çу уйăхĕнче кăна райцентрти магазинра “АККОНД” обществăн “Пылак планета” уйрăмĕ ĕçлеме пуçларĕ.
Декабрьте вара пирĕн сумлă ентешĕмĕр енĕшнăрвашсене савăнтарма тĕллев тытнă. Общество хăйĕн 70 çулхи юбилейĕ умĕн фирма магазинĕсен пĕрлĕхне пысăклатсах пырать.
Иртнĕ ытлари кун кооператорсен Енĕш Нăрваш ялĕнчи пĕрремĕш номерлĕ магазинĕ умĕнче ирех сутуçăсемпе “Тăвайри кооператив” потребобщество ĕçченĕсем хĕвĕшме тытăнчĕç. Вĕсем суту-илÿ çуртĕнчи сентресене малтанхи кунах тирпей-илем кÿнĕ. Пĕрин çине “АККОНД” общество кăларакан изделисене вырнаçтарса тухнă. Мĕнле кăна канфетпа печени çук пулĕ “Пылак планета” уйрăмра?!
Кĕçех район администрацийĕн ĕçĕсен управляющийĕ В.Чайкин, “Тăвайри кооператив” потребобщество совечĕн председателĕ В.Федоров, “АККОНД” обществăн представителĕ килсе çитрĕç.
–Енĕш Нăрваш ялĕн хаклă çыннисем, пĕр-икĕ çул каялла кунта сире хăвăра тавар суйлама условисем туса панăччĕ. Паян вара эпир Чăваш Патшалăх Канашĕн депутачĕ Валерий Николаевич Иванов хăйĕн ентешĕсене кÿрекен тепĕр парнине хаклама пухăнтăмăр. “Пылак планета” – Шупашкарти “АККОНД” обществăн уйрăмĕ, унта 150 тĕрлĕ япала суту-илĕве сĕннĕ. Канфет-печенисен хакĕсем фирма магазинĕнче йÿнĕрех. Пылак çимĕçсене сирĕн ялтан тухмасăрах туянма пулать халь. Пирĕн сутуçăсемпе çыхăну тытсах тăрăр, кĕрсех çÿрĕр магазина, – çапла вĕçлерĕ сăмахне Вячеслав Николаевич.
Унтан район администрацийĕн ĕçĕсен управляющийĕ В.Чайкин, Енĕш Нăрваш ял тăрăхĕн пуçлăхĕ В.Петров, ялти магазин заведующийĕ Л.Васильева, “Акконд” общество представителĕ тухса калаçрĕç, енĕшнăрвашсене кооператорсемпе тачă туслă пурăнма сĕнчĕç.
Кунта яланхи пекех “Тăвай çăкăрĕ”, “Тăвайри общепит”, “АККОНД” тата “Акконд–агро фирма” обществăсен таварĕсене суту-илĕве кăларĕç. “Чебоксарский” ятлă ликер завочĕн, Элĕкри улма-çырла комбиначĕн, Шупашкарти, Етĕрнери, Вăрнарти кăлпасси изделийĕсене те туянма пулать. Чăваш Енри ытти организацисемпе те ĕçлĕ çыхăнура “Тăвайри кооператив” потребобщество.
Республикăри тавар кăларакан хăш-пĕр коллективсен продукцийĕсемпе Енĕш Нăрвашра пурăнакансем пĕрле кăмăлласах паллашрĕç.
–Пире, ялта пурăнакансене, тимлĕх уйăрассине лайăхлатсах пынăшăн Чăваш Республикин Пуçлăхне Михаил Игнатьева, “АККОНД” обществăн генеральнăй директорне Валерий Иванова, район администрацине, хамăрăн кооператорсене тав тăватпăр. Вĕсем вырăнта тунă япаласене ытларах илме сĕнсе тĕрĕс тăваççĕ, – терĕç юлашкинчен тавар туянакансем.
Л.Васильева заведующипе И.Моисеева сутуçă вĕсене куллен килсех çÿреме сунса ăсатрĕç.
Источник: "Ял ĕçченĕ"