24 августа 2012 г.
Çурла уйăхĕн 22-мĕшĕ – Раççей Федерацийĕн патшалăх ялавĕн кунĕ. Ăна 1994 çултан пуçласа паллă тăваççĕ.
Пирĕн çĕр-шыври кашни патша ялава улшăну кĕртнĕ. Алексей Михайлович патша вăхăтĕнче, 1667 çулта шурă, кăвак, хĕрлĕ тĕслĕ ялава пĕрремĕш хут çĕкленĕ. 1858–1883 çулсенче ялав хура, сарă, шурă тĕслĕ пулнă. Александр III патша хĕрлĕ, кăвак, шурă тĕссене каялла тавăрнă.
1896 çулта Николай II патша корона тăхăнас умĕн шурă-кăвак-хĕрлĕскер Патшалăх ялавĕн статусне илнĕ.
Революци, граждан вăрçи вăхăтĕнче хĕрлĕ тĕслĕ ялав совет влаçĕн символĕ пулнă.
1991 çултанпа пирĕн ялава каллех виçĕ тĕс илем кÿрет. Шурă – тасалăха, кăвак – шанчăклăха, хĕрлĕ тĕс хăюллăха палăртать.
Районти культурăпа информаци центрĕсем, Раççей ялавне халалласа, тĕрлĕ мероприятисем ирттерчĕç. Викторинăсем, калаçусем, тĕл пулусем пулчĕç.
Енĕш Нăрваш ялĕнчи культурăпа информаци центрĕнче ĕçлекенсем те ку уява тивĕçлĕ шайра йĕркелерĕç. “Раççей символики, историйĕ тата хальхи самана” ятлă кĕнекесен выставкипе кăмăлласах паллашрĕç çынсем. Викторина ыйтăвĕсене ачасем лайăх хуравларĕç. “Вĕлкĕштĕр, Раççей ялавĕ” програмăпа ялти “Пучах” агитбригада çула тухрĕ. “Теремок” ача садне çÿрекенсемпе унта ĕçлекенсем, ашшĕ-амăшĕ, ял çыннисем кăмăлласа йышăнчĕç культура ĕçченĕсен пултарулăхне. Енĕш Нăрвашри библиотека заведующийĕ З.Мижеева Раççей ялавĕн историйĕпе паллаштарчĕ.
Каçхине çамрăксем теннисла выляса тупăшрĕç, дискотекăра пулчĕç. Источник: "Ял ĕçченĕ"