16 декабря 2020 г.
Почта çыхăну уйрăмĕсене, хальхи вăхăтра уйрăмах, çын нумай кĕрсе тухать. Тĕрлĕрен тÿлевсемпе вăхăтра татăласшăн пурте – Çĕнĕ çула никам та парăмпа пуçласшăн мар. «Пĕтĕм Раççейри çырăнтару вунăкунлăхĕ» акцие декабрĕн 20-мĕшĕчченех тăснине асра тытса чылайăшĕ кунта хăйсене килĕшекен хаçат-журнала çырăнма килет.
Районта пурăнакансем декабрĕн 3-мĕшĕнчен пуçласах район хаçатне – «Елчĕк ене» 2021 çулхи пĕрремĕш çур çул валли йÿнĕ хакпах – 423 тенкĕ те 48 пуспа çырăнма пултараççĕ.
– Хаçата çынсем юратса вулаççĕ, çак кунсенче ăна пĕрин хыççăн тепри йÿнĕрех хакпа çырăнса юлма васкать,- тет Аслă Пăла Тимешри почта çыхăну уйрăмĕн начальникĕ Зоя Елисеева.
Кушкă ялĕн хастарĕ Василий Гордеев хăй вăхăтĕнче редакципе туслă çыхăнураччĕ. Вăл ахаль вулакан анчах мар, хаçата тĕрлĕ темăпа статья-корреспонденци нумай çырнă.
Кушкă шкулĕнче фельдшерица пулса тăрăшакан Валентина Алексеева та хаçат тусĕ.
– Район хыпарĕсемпе хаçат урлă туллин паллашатпăр. Ĕçтешсемпе пĕлекен çынсем çинчен ăшă сăмахпа çырса кăтартнисемпе уйрăмах кăсăкланса вулатăп, – тет вăл.
Светлана АНАТОЛЬЕВА
Источник: "Елчĕк Ен"