21 сентября 2019 г.
Кĕркунне хресченĕн чи кăткăс та хĕрÿ тапхăр. Тырпула кĕлетсене пуçтарса кĕртнĕ, халĕ мĕнпур вăй кукуруза уйне куçнă.
«Комбайн» ял хуçалăх производство кооперативĕнче кукурузăна силоса хывас ĕçе куллен хăвăртлатса пыраççĕ. Белокпа тата углеводпа пуян культура мăйракаллă шултра выльăхсемшĕн чи паха апат шутланать. Çавăнпа та ăна кăçал хуçалăхра 140 гектар çинче акса ÿстернĕ. Хальлĕхе 80 гектар çинчен пуçтарса илнĕ.
Силос вырнă çĕрте 2 комбайн ĕçлет. «Дон-680» техникăсене В.Капламовпа А.Никифоров комбайнерсем пĕр тикĕс ĕçлеттереççĕ. Симĕс массăна траншея патне турттарнă çĕрте Н.Головин, А.Васильев, А.Хардов, Г.Жирнов, А.Григорьев водительсем, В.Айметов, К.Александров, А.Перцев механизаторсем пысăк хастарлăх кăтартаççĕ. Л.Головин, А.Емильев, О.Зайцев трактористсем хăйсене шанса панă техникăсемпе симĕс массăна пусăрăнтараççĕ.
Хуçалăх ĕçченĕсем кукурузăна кĕске срокра пухса кĕртме планланă.
Сăн ÿкерчĕкре: В.Капламов комбайнер.
Источник: "Елчĕк Ен"