24 мая 2017 г.
Çамрăк армеецсен "Зарница" тата "Орленок" çарпа спорт вăййисем районта кăçалхипе 49-мĕш хут иртрĕç.
Çамрăк армеецсен вăййисене çитĕнекен ăрăва патриотла воспитани парас, çар ретне тăма юрăхлă ăру çитĕнтерес тĕллевпе йĕркелеççĕ.
Кĕçĕн Таяпа вăрманне кăçал пĕтĕмĕшле пĕлỹ паракан тĕп шкулсенчи - 11, вăтам шкулсенчи 7 команда пуçтарăнчĕ. Спорт вăййисен участникĕсене чи малтанах район администрацийĕн пуçлăхĕн пĕрремĕш çумĕ - райадминистрацин вĕренỹпе çамрăксен политикин пайĕн начальникĕ Леонард Левый, "Чăваш Ен наци телерадиокомпанийĕ" автономи учрежденийĕн директорĕ Алексей Белов, Чăваш Республикинчи çар комиссариачĕн Комсомольски тата Елчĕк районĕсенчи уйрăмĕн ертỹçи Сергей Данилов саламларĕç. Вĕсем кашни командăнах çарпа спорт ăмăртăвĕсенче ăнăçлă тупăшма суннă май çак вăйăсем кăмăл çирĕплĕхне туптанине палăртрĕç. Стройпа утасси, шывра ишесси, пневматика винтовкинчен тĕл пересси, автомата салатса пуçтарасси, çул-йĕр правилисене асра тытасси, инкеке лекекене пĕрремĕш пулăшу парасси, тĕрлĕ чăрмавсене çĕнтерсе чупасси - кашни ăмăртура вĕренекенсем чун хавалĕпе тупăшрĕç. Тăван килтен аякра чухне ачасем хăйсем тĕллĕн апат пĕçерме, ĕç кунне йĕркелеме хăнăхрĕç. Ăмăртусенчен пушансан вĕсем пултарулăх конкурсĕсене хутшăнчĕç, футболла тата волейболла выляса туслăха çирĕплетрĕç.
"Зарница" çарпа спорт вăй-йисенче чи пултаруллисем Елчĕк шкулĕнче вĕренкекенсем пулнине палăртрĕç жюри членĕсем. Иккĕмĕш вырăна çак шкулти кадет класĕ йышăнчĕ, виççĕмĕш вырăнта - Кивĕ Эйпеçсем. "Орленок" çарпа спорт вăййисенче пĕрремĕш вырăна - Елчĕк, иккĕмĕш вырăна - Кушкă, виççĕмĕш вырăна Курнавăш шкулĕсенче вĕренекенсем тухрĕç. Командирсен конкурсĕнче "Зарница" ушкăнĕнче Елчĕкри вăтам шкулта вĕренекен кадет класĕнчи Екатерина Цыганова, "Орленок" ушкăнĕнче Анастасия Краснова йышăнчĕç.
Çĕнтерỹçĕсем район чысне Çĕрпỹ районĕнче иртекен республикăри финалти вăйăсенче хỹтĕлĕç.
Ф.ЦЫГАНОВА.
Источник: "Елчĕк Ен"