13 мая 2017 г.
Чăваш Республикин Министрсен Кабинечĕн Председателĕн çумĕ - ялхуçалăх министрĕ Сергей Артамонов Çĕнтерÿ уявĕ хыççăн, майăн 10-мĕшĕнче республикăри муниципаллă районсен пуçлăхĕсемпе çуркуннехи уй-хир ĕçĕсене пурнăçласси пирки ирттернĕ канашлура Елчĕк районĕ ку енĕпе чи малти пулнине палăртса каланă.
Яланах çапла. Районти ялхуçалăх предприятийĕсемпе хресчен /фермер/ хуçалăхĕсенче çуркуннехи уй-хир ĕçĕсене кашни çул пысăк пахалăхпа пурнăçласа хăвараççĕ, çакна кура пысăк тухăç алла илеççĕ. Çанталăк условийĕсене пула кăçал, малтанхи çулхисемпе танлаштарсан, ака ĕçĕсене каярах юлса пикеннĕ пулин те ял çыннишĕн ăнăçлă çулталăк пуласса шанса тăратпăр. Район администрацийĕн пуçлăхĕ Николай Миллин та çаплах шутлать. «Май уйăхĕнче çумăрлă, сулхăн çанталăк пулни тыр-пул ăнса çитĕнессе», - тет Николай Петрович.
...Ĕнерхи кун тĕлне ялхуçалăх предприятийĕсенче пĕрчĕллĕ тата пăрçа йышши культурăсене пурĕ 7269 гектар /67 процент/, хресчен /фермер/ хуçалăхĕсенче 3049 гектар /55 процент/ акса хăварнă. «Победа» ОООра тăрăшакансем Çĕнтерÿ уявĕ тĕлне ака ĕçĕсене вĕçлетпĕр тесе хăйсем малтан палăртса каланă сăмаха чăн ĕçпе çирĕплетсе кăтартрĕç. Вĕсем пĕрчĕллĕ тата пăрçа йышши культурăсене акассине районта чи малтан вĕçлекенсем пулчĕç. Сăмах май, тыр-пул туса илнипе пĕрлех, выльăх-чĕрлĕх отрасльне аталантарассине тĕп вырăна хуракан - çулсерен чи нумай сĕт туса илнипе палăракан çак ялхуçалăх предприятийĕнче пĕр çул тата нумай çул ÿсекен курăксене палăртнă лаптăксенче акассине те вĕçленĕ.
«Труд», «Комбайн», «Сатурн», «Рассвет», Ленин ячĕллĕ ялхуçалăх производство кооперативĕсенче те ака ĕçĕсене паян-ыранах вĕçлеме палăртаççĕ.
Светлана АРХИПОВА.
Источник: "Елчĕк Ен"