06 мая 2017 г.
Чăваш Республикин Министрсен Кабинечĕн Председателĕн çумĕ - ялхуçалăх министрĕ Сергей Артамонов кĕçнерникун пирĕн районта ĕçлĕ визитпа пулсан Елчĕксем яланах малта пулнине, черетлĕ çураки ĕçĕсене те пысăк хастарлăхпа пикеннине палăртса каланă.
Район администрацийĕн пуçлăхĕпе Николай Миллинпа тата ялхуçалăх пайĕн начальникĕпе Петр Тремасовпа пĕрле вĕсем çĕнĕ технологисене анлăн ĕçе кĕртекен, машинăпа тракторсен паркĕсене ку чухнехи техникăпа пуянлатассине тĕп вырăна хурса ĕçлекен «Прогресс» АХО, «Комбайн» ЯХПК тата «Победа» ООО уй-хирĕсенче пулса курнă - ака ĕçĕсем епле пынипе паллашнă, уй-хир хуçисен шухăш-кăмăлне пĕлнĕ.
...Куç хăрать те алă тăвать. Çанталăк условийĕсене кура ака ĕçĕсене пурнăçлама, иртнĕ çулхипе танлаштарсан, каярах пикеннĕ пулин те «Победа» ОООри çĕр ĕçченĕсем Аслă Çĕнтерÿ уявĕ тĕлне пĕрчĕллĕ тата пăрçа йышши культурăсене акас ĕçе вĕçлеме хăйсен умне çирĕп тĕллев илнĕ. Ĕнерхи кун тĕлне кунта пĕтĕмĕшле лаптăкри тыр-пулăн 80 процентне агротехника йĕркипе килĕшÿллĕн пысăк пахалăхпа акса хăварма ĕлкĕрнĕ. Вăрлăха им-çамлас ĕçе епле йĕркеленипе паллашас пулсан та чăркăшма сăлтав çук. Çак ĕçе хутшăнакан çынсен сывлăхне сиен кÿрес мар тесе йĕркепе килĕшÿллĕн кирлĕ хÿтĕлев тумтирĕсене туянса панă. Им-çамсемпе ĕçлекенсене апатпа пĕрле кашни кун сĕтпе те тивĕçтереççĕ. Çапла майпа дирекци ĕçлекен çынсен сывлăхне упрассине те тĕп вырăна хуни çак тĕслĕхре те уççăнах çирĕпленет.
Ялхуçалăх предприятийĕнче тĕш тырă культурисене акма икĕ агрегат хутшăнать, яваплă ĕçе пурнăçлама Анатолий Алексеевпа Александр Кошельков механизаторсене çирĕплетнĕ. Геннадий Дружининпа Владимир Козлов акнă лаптăксене çийĕнчех пусăрăнтараççĕ.
«Прогресс» АХО тата «Комбайн» ЯХПК уй-хирĕсенче ака ĕçĕсем кал-кал, ăнса пыраççĕ. Механизаторсен кăмăл-туйăмĕ те хавхалануллă. Çакă вара - чи кирли.
Светлана АРХИПОВА.
Елена ИГНАТЬЕВА сăнÿкерчĕкĕ.
«Комбайн» ЯХПК ертÿçи Гурий Федоров ЧР ялхуçалăх министрне Сергей Артамонова тата район администрацийĕн пуçлăхне Николай Миллина хуçалăх ĕçĕ-хĕлĕпе паллаштарать
Источник: "Елчĕк Ен"