08 апреля 2017 г.
Районти «Çулталăк воспитателĕ», «Чи лайăх класс ертÿçи», «Çулталăк вĕрентекенĕ-2017» конкурссем хыçа юлнă хыççăнах унта хутшăннă педагогсем /çĕнтерÿçĕсемсĕр пуçне, вĕсен тупăшăвĕ малалла тăсăлать-ха/ çăмăллăн сывласа ячĕçех пулĕ. Эрни-эрнипе çывăрман каçсем, пăшăрхану, тупăшу, хаклав - пурне те кăмăл-туйăм, ăс-тăн витĕр кăларатăн. Çапах та малалла ăнтăлни, хăв ĕçне тĕплĕ пĕлни, ачасене юратни, шкул чысне хÿтĕлес тесе хавхаланса тăрăшни ахаль иртмен. Тупăшусенче ĕçтешсен ырă та паха опытне ăса хывни, пĕр-пĕрне пултарулăхпа паллаштарни, малалла ĕçлеме ăсталăх пухни мĕне тăрать. Акă, Елчĕкри искусство шкулне чыслава пуçтарăннă вĕрентекенсемпе воспитательсен пит-куçĕ савăнăçпа çиçет, кăмăл-туйăмĕ тата хавхаланса ĕçлеме хистет.
Маларах асăннă конкурссене пултаруллă педагогсене тупса палăртас, педагогăн пуян опытне малалла сарас, вĕрентекенпе воспитатель профессийĕсен ят-сумне çĕклес тĕллевпе çулсеренех ирттереççĕ. Çак çулсем хушшинче професси конкурсĕсене хутшăнман педагог та юлмарĕ пулĕ. Вĕсем педагогсен пултарулăхне хаклама, вĕренекенсене воспитани пама, вĕрентес ăсталăха ÿстерме, çĕнĕлĕхсене алла илме пулăшаççĕ. Вĕрентÿ историйĕнче кашни çул çĕнĕрен те çĕнĕ ятсем çырăнаççĕ.
Савăнăçлă мероприяти ача сачĕн воспитателĕсене чысланинчен пуçланчĕ. Кăçал тупăшăва вунулттăн тухнă. Лауреатсен йышне вуннăн кĕнĕ. Çĕнтерÿçĕ - «Шевле» ача сачĕн музыка ертÿçи Алина Молодова.
«Чи лайăх класс ертÿçи» конкурса хутшăнакансем çулсеренех йышлă. Кăçал вунă класс руководителĕ хăйсен ăсталăхне, тавра курăмне, пĕлĕвне кăтартнă. Вĕсенчен тăваттăшĕ лауреат. Çĕнтерÿçĕ - Кушкăри 10 класра вĕренекен ачасене ертсе пыракан Людмила Пешенькова. Людмила Степановна çĕнтерÿ хăй тĕллĕн килменнине, кунта шкул коллективĕн, ĕçтешĕсен, уçă уроксем ирттернĕ Елчĕк шкулĕн вĕренекенĕсен тÿпи пуррине те палăртрĕ.
«Çулталăкри вĕрентекен» конкурсра 16 учитель тупăшнă. Вĕсем ирттернĕ уроксемпе занятисем темăсене анлă та тарăн çутатнипе уйрăлса тăнă. Финала тухнă пилĕк вĕрентекен хăйсен ĕçĕнче чăн-чăн профессионал пулнине çирĕплетнĕ. Çĕнĕ Пăвари пĕтĕмĕшле пĕлÿ паракан вăтам шкулти истори вĕрентекенĕ Алексей Смирнов çĕнтерÿçĕ ята тивĕçлине çирĕплетнĕ.
Чыславра район администрацийĕн пуçлăхĕн пĕрремĕш çумĕ-вĕренÿпе çамрăксен политикин пайĕн пуçлăхĕ Леонард Левый конкурса хутшăннисене саламларĕ. Вăл районти конкурсра виçĕ ăрури педагогсем тупăшнине, учитель профессийĕ ăруран ăрăва куçнине палăртрĕ. Акă, «Çулталăкри вĕрентекен» конкурсра тупăшнă Раиса Федорова /Кивĕ Эйпеç/ хăй вăхăтĕнче Галина Каринкинăна /Елчĕк/, Галина Каринкина Марина Журавлевăна /Хăвăлçырма/ вĕрентнĕ. Виççĕшĕ те çулсем иртнĕ май пĕр конкурсра вăй виçнĕ. Виççĕшĕ те лауреатсен йышне кĕни пушшех савăнтарать.
Уява пуçтарăннисене Елчĕкри искусство шкулĕн преподавателĕсем, воспитанникĕсем илемлĕ юрă-ташăпа саламларĕç. Кашни участника, лауреата, çĕнтерÿçĕне сертификатсем, чĕрĕ кĕлчечексем, парнесем парса чысларĕç.
В.СМИРНОВА.
Сăнÿкерчĕкре: А.Молодова, А.Смирнов, Л.Пешенькова.
Источник: "Елчĕк Ен"