01 апреля 2017 г.
Акана тухиччен шутлă кунсем анчах тăрса юлчĕç. Юлнă вăхăтпа усă курса «Комбайн» ялхуçалăх предприятийĕнче семинар-вĕренÿ иртнĕ.
Механизаторсемпе водительсене, кооперативра вăй хуракан - уй-хир ĕçĕпе çыхăннă ытти çынсене яваплă тапхăр умĕн пурне те пĕрле пухса кирлĕ ыйтусене сÿтсе явасси, техника хăрушсăрлăхĕн йĕркисене вĕренсе алла илесси ялхуçалăх предприятийĕнче унчченех йăлана кĕнĕ.
Пĕрле пухăннипе усă курса Петр Анисимов тĕп агроном черетлĕ çуракире пурнăçламалли ĕç планĕпе паллаштарнă, ялхуçалăх культурисене акса çитĕнтерес, выльăх апачĕ хатĕрлес ĕçре агротехника ыйтнине тĕпе хурса ĕçлесси, Александр Сусметов тĕп энергетик, техника хăрушсăрлăхĕн инженерĕ Геннадий Ильин хăрушсăрлăх йĕркисем пирки, производствăра асăрхануллă пуласси, Кавалти ФАП фельдшерĕ Ольга Изратова инкек сиксе тухсан çынна пĕрремĕш пулăшу памалли йĕркесем пирки чарăнса тăнă, Валентина Николаева тĕп экономист ĕç килĕшĕвĕсемпе, ĕç вăхăтне табельсем çине тĕрĕс палăртса çырассин йĕркипе паллаштарнă.
Сăмах май, акана хутшăнакансем иртнĕ кунсенчех медицина тĕрĕслевĕ витĕр тухнă, механизаторсемпе водительсем акана тухас умĕн тĕллевлĕ инструктаж илеççĕ, пурне те ĕç тумтирĕсемпе тивĕçтереççĕ, комбайнсемпе тракторсем çине пушар сÿнтермелли хатĕрсемпе аптечкăсем вырнаçтараççĕ.
Семинар-вĕренÿ ĕçне ялхуçалăх предприятийĕн председателĕ Гурий Федоров пĕтĕмлетнĕ. Пĕрлехи вăйпа тăрăшса ĕçленин тивлетне пула ака ĕçĕсене пурнăçлама яланхи пекех тĕплĕн хатĕрленнине, апла пулин те яваплă тапхăрта ĕç дисциплинине çирĕп пăхăнасси пирки палăртса каланă.
С.АНАТОЛЬЕВА.
Источник: "Елчĕк Ен"