07 сентября 2016 г.
Кивĕ Арланкассинче пурăнакан Раиса Владимировна Богданова пĕр ĕмĕрхи юбилейне паллă тунă. Тыл ветеранне Аслă Пăла Тимеш ял тăрăхĕн пуçлăхĕ Г.Зайцев, районти халăха социаллă пулăшу паракан пай ертÿçи Ирина Аникина, культура ĕçченĕсем саламланă.
Раиса Владимировна 1916 çулхи августăн 20-мĕшĕнче Акчел ялĕнче кун çути курнă. Унăн ашшĕ - Владимир Лебедев /ялта ăна Улатимĕр тесе чĕннĕ/ таврари чи лайăх платник, столяр пулнă. Пасарсенче сĕтел-пукан, уйрăмах арча, туса сутса пурнăçа аталантарнă. Ĕçре пит харсăр пулнă вăл. Уй-хирте тыр-пул нумай çитĕнтернĕ.
Улатимĕр тетен савнă мăшăрĕ Вера аппа пилĕк ача çуратнă хыççăн пурнăçран вăхăтсăр уйрăлнă. Пĕртăвансем тăлăха юлнă. Чи асли Раиса пулнăран çемье йывăрлăхĕ ун çине тиеннĕ. Кĕçĕннине, çулталăкри Саня аппана, усрава пама тивнĕ. Хĕрпĕрчине мăшăрсăр тăрса юлнă Алтатье аппа хăйĕн хÿттине илнĕ. Пурнăç малаллах шунă. Раиса аппана пурнăç тылли тылламаллипех тылланă. Ашшĕне кулак тесе раскулачить тунă. Амăшĕнчен юлнă юлашки тумтирĕсене илсе тухса кайнă.
Йывăрлăхсене чăтса Раиса 7 класлă шкула вĕренсе пĕтернĕ. 1924 çулта малалла вĕренес ĕмĕтлĕ хĕр Канашри медицина шкулĕн трахомăпа кĕрешекенсен курсне вĕренме каять. Ăна лайăх паллăсемпе вĕренсе пĕтерет. Пĕр вăхăт Елчĕк больницинче куç чирĕпе кĕрешекен медицина сестри пулса тăрăшать.
Трахома чирĕ аталанса пынине кура Раиса Владимировнăна Кушкă ялне ĕçлеме куçараççĕ. Кушкăсене чир-чĕртен сыватсан пултаруллă хĕре Тăрмăшри фельдшер пунктне ĕçлеме яраççĕ. Унта ĕçленĕ вăхăтра маттур пикене Кивĕ Арланкасси ялĕнчи «Комсомолия» колхоз счетоводĕнче ĕçлекен Ксенофонт Богданов куç хывнă. 1936 çулта çамрăксем çемье çавăрнă. Тепĕр çулхине çамрăк мăшăрăн çемйинче Вениамин çуралнă. Анчах Богдановсен çемье савăнăçĕ нумая пыман. Çав çулах Ксенофонт Семеновича салтак службине кайма повестка параççĕ. Çар службинче тăнă вăхăтра Аттелĕхĕн Аслă вăрçи пуçланать. Раиса аппа мăшăрне текех тĕл пулайман. Ĕмĕр тăршшĕпе кĕтнĕ пĕр ачана ура çине тăратнă хĕрарăм савнă мăшăрне. Кĕтсе илеймен.
Раиса Владимировна ялти фельдшер пунктĕнчех ĕçленĕ. Вăрçă вăхăтĕнче Улатăр тăрăхне окоп, траншея чавма кайнă. Вăрçă хыççăн ялхуçалăхĕнче тăрăшнă. Колхозра вăй хурсах пенсие тухнă.
Раиса Владимировнăн Вениамин ывăлĕ «Победа» колхозра 25 çул трактористра, 15 çул комплекслă бригадăн бригадирĕнче вăй хунă. Хастар ĕçшĕн ăна Октябрьти Революци, Ĕçлĕх Хĕрлĕ Ялавĕ, «Хисеп Палли» орденсемпе тата медальсемпе наградăланă. 1979 çулта Вениамин Ксенофонтовича «Чăваш АССР тава тивĕçлĕ механизаторĕ» хисеплĕ ят парса чыс тунă.
100 çула хыçа хăварнă Раиса аппа паян та аван çÿрет. Халĕ унăн 5 мăнук, кĕçĕн мăнукĕсем - 19. Ĕмĕр тăршшĕнче тем тĕрлĕ нуша-терт курсан та хуçăлса ÿкмен вăл. Шав малалла талпăннă, ĕçпе йăпанса пурăннă.
Мария БОГДАНОВА.