30 июля 2016 г.
аса илет Кушкă ялĕнчи ĕç ветеранĕ Илья Самаков.
Тĕлĕнмелле çын вăл. Кĕрнеклĕ те вашаватлăскере часах 82 çул тултарать тесе кам калĕ? Самантпа та пушă лармасть хăй: кил таврашĕнче ĕçлет, автомашинăпа çÿрет. Ăс-тăнпа çивĕч арçын иртнине аса илсе каласа кăтартнине итлеме кăмăллă.
Çăмăл пурнăçпа пурăнман вăл. Вăрçă вăхăтĕнче çеç мар, каярах та çиме çăкăр, тăхăнма тумтир пулман. Çамрăклах ĕçе кÿлĕннĕ Илья лашапа улăм, кĕлте, тырă турттарнă, кĕлтесенчен капан, çĕмел купаланă, жнейкăпа тырă вырнă. Кĕлеткипе çÿллĕ, вăйлă çамрăка колхозран 16 çултах аслисемпе пĕрле Улатăра вăрман кăларма янă. Унпа пĕрле кунта пĕр ял çыннисем - Зинон Барановпа Василий Григорьев та тăрăшнă.
Ĕçленĕшĕн пĕр пус та паман, çулталăк вĕçĕнче çеç кăштах тырă тивнĕ. Хĕллехи сивĕ çанталăкра юр çине ларса пăчăкăпа йывăç касасси ача вăййи мар. Çитменнине, апачĕ те тăранмалăх тивĕçмен. Мĕнле чăтнă-ши? 5 çул вăрман кăларнă. 1952 çулта, тин 18 çул тултарнă çамрăка ĕçре паттăр пулнăшăн «Ĕçри хастарлăхшăн» медальпе чысланă.
Ворошилов ячĕллĕ колхоза В.В.Зайцев ертсе пынă çулсенче Аслă Пăла шывĕ урлă ГЭС хывнă. Электростанци тунă çĕрте усă куракан тимĕр хатĕрĕсене Канашран лаша лавĕсемпе турттарса килнĕ. Илья Самаков çак ĕçе те çитĕннисенчен кая мар хутшăннă.
Илче пичче 1954-1956 çулсенче Совет Çарĕнче службăра пулнă, унтан таврăнсан колхозра шофер пулса ĕçленĕ. Ĕçре иртнĕ 40 çул хушшинчи тапхăрта вăл механик та, гараж заведующийĕ те пулнă.
В.Г.Свеклов «Победа» колхоза ертсе пынă çулсенче больница, шкул çурчĕсем хăпартнă. Строительство материалĕсене турттарма колхозри водительсене явăçтарнă. Çак тапхăрта колхоз гаражĕнчен кашни ир 80 грузовикран кая мар рейса тухнă. Пĕр кунхине пĕтĕмпе шутланса тăракан 97 автомашина та ĕçе тухсан П.Портнов гараж заведующийĕпе И.Самаков механик чунтан савăннă. Вăл вăхăтра техникăн саппас пайĕсене тупма та çăмăл пулман, вĕсене Мускаври, Чулхулари, Волгоградри заводсене туянма çÿренĕ.
Ĕçри пысăк çитĕнÿсемшĕн 1968 çулта Илче тетене «Республикăри чи лайăх механизатор» ят панă. Хăйĕн ĕмĕрне пархатарлă ĕçре ирттернĕ çын Аслă Çĕнтерĕвĕн 60 çул, 65 çул, 70 çул юбилей медалĕсене те тивĕçнĕ.
Самаковсен çемйи пысăк. Мăшăрĕпе, Лидя аппапа 1959 çултанпах килĕштерсе пурăнаççĕ, ачисемпе, мăнукĕсемпе савăнаççĕ.
- Пилĕк председательпе ĕçлерĕм, пурте тăрăшуллă ертÿçĕсем пулнипе палăрнă. Çын ĕçпе илемлĕ. Халĕ пурнăçĕ те лайăх, ĕлĕкхи мар. Çамрăксен ĕçлеме анчах ÿркенмелле мар. Ун чухне пирĕн хăватлă çĕршывăмăр тата тĕреклĕрех пулĕ, - тет Илья Самаков çамрăксене ăс парса.
С.БАРИНОВА,
Кушкă ялĕ.