23 июля 2016 г.
«Победа» сахал яваплă юлташлăхри уй-хир ĕçченĕсем черетлĕ вырмара та яланхи хастарлăхпа тимлеççĕ. Кĕске вăхăтрах вĕсем пÿлмесене 6000 центнер ытла тĕш тырăпа тултарнă.
«Агрос-530», «Полессе» йышши «уй-хир карапĕсен» хуçисем - Александр Кошельковпа Иван Овечкин малтан кĕр тыррисене вырса çапса тĕшĕлес ĕçре тăрăшрĕç.
- Кĕçнерникунхи çумăрччен вĕсем «Башкирская» сортлă кĕрхи туллăн 85 гектарне çапса тĕшĕлеме ĕлкĕрчĕç. Вăл тухăçлă çитĕннипе тата ăна тăкаксăр пÿлмесене пухса кĕртме пултарнипе савăнтăмăр. Хальлĕхе пĕр гектартан тухакан тухăç 35 центнер ытла пулнине палăртатпăр, - терĕ ялхуçалăх предприятийĕн директорĕ Николай Головин.
Сăмах май, кĕр тыррисенчен кирек хăш çанталăк условийĕнче те тивĕçтерекен шайри тухăç алла илме пулнине асра тытса ăна кунта кашни çул çителĕклĕ таран акса хăвараççĕ. Кăçал та вĕсен лаптăкĕ 220 гектар пулнă.
А.КАРЛИН.