30 марта 2016 г.
Ĕлĕкхи «Победа» колхоза пĕрлештернĕ ялсенче Энтепери Николай Емельянович Павлова пĕлмен çын çук та пулĕ.
Шкул хыççăн тракторист правине илнĕскер, Совет Çарĕнче хĕсметре пулнă. Яла таврăнсан ăна колхоз ертÿçисем бригадир çумĕ пулма çирĕплетнĕ. Техникăна юсасси тата ăна йĕркеллĕ ĕçлеттересси, хăйшĕн анчах мар, çыншăн та яваплăха туйни çамрăка тăрăшуллă пулма хистенĕ.
Часах ял халăхĕ Николай Павлова бригадир пулма суйланă. Энтепе ялĕ колхоз правленийĕнчен аякра вырнаçнă, çавна пула нумай ыйтăва бригадирăн татса пама тивнĕ. Çынпа хутшăнма, кÿрентермесĕр ĕçлеттерме пĕлекене колхозниксем хисепленĕ, халĕ те хисеплеççĕ.
Николай Емельяновичпа мăшăрĕ - Мария Ивановна ывăлпа хĕр çуратса çитĕнтерчĕç. Ачисем те хăйсем пекех ăслă пулчĕç. Ывăлне, Сергей Николаевича, Хусан университетĕнче 2-мĕш курсра вĕреннĕ чухнех преподаватель ĕçне шанса пачĕç. Халĕ вăл биологи наукисен кандидачĕ, доцент, Федерацин Хусанти университетĕнче физвоспитани вĕрентет, тренер пулса Пĕтĕм тĕнчери ăмăртусене хутшăнакансене хатĕрлет.
Хĕрĕ, Ольга Николаевна, Тольятти хулинче ача садĕнче вăй хурать.
Павловсем тивĕçлĕ канура пулсан та ĕçсĕр лармаççĕ. Ĕне, пăру, ытти выльăх усраççĕ. Николай Емельянович пур ĕçе те пĕлет, ăна Тутарстанри Пăва хули таран хуçалăхсене пулăшма чĕнеççĕ. Нумай Тав хутне, медале тивĕçлĕ пулнă ĕç ветеранĕ ялти çамрăксене те професси суйлама пулăшать.
С.БАРИНОВА.
Кушкă ялĕ.