27 января 2016 г.
Ĕнер Чăваш оперăпа балет театрĕнче иртнĕ Чăваш Республикин Патшалăх Канашĕн черетлĕ вăтăр пиллĕкмĕш сессийĕнче Чăваш Ен Пуçлăхĕ Михаил Игнатьев Патшалăх Канашне тата Чăваш Ен халăхне янă Çырăвĕпе паллаштарнă.
Çырăва итлеме Раççей Федерацийĕн Патшалăх Думин, Чăваш Республикин Патшалăх Канашĕн депутачĕсем, республикăн ĕç тăвакан влаç органĕсен, федерацин территори органĕсен, муниципалитетсен ертÿçисем, тĕн, общество организацийĕсен представителĕсем, Чăваш Енри предприятисемпе организацисен, массăллă информаци хатĕрĕсен ертÿçисем хутшăннă.
Çырăва пуçланă май, Чăваш Республикин Пуçлăхĕ Михаил Игнатьев çакна палăртнă: «Раççей, çавăн пекех пĕтĕм тĕнче ÿссе пыракан хăрушлăхпа, хăратупа тĕл пулчĕç. Пирĕн çĕршыва хирĕçле санкцисен режимĕ ĕçлет. Нефть тата валюта рынокĕсенче çивĕчлĕх ÿссех пырать. Çакă регионсен экономики çине те пырса çапать».
Раççейри пекех республикăшăн тĕп çул-йĕр «импорта хамăрăн продукципе улăштарасси, бюджет шайлашулăхĕ, апат-çимĕç хăрушсăрлăхĕ, çынсене куллен пулăшса пырасси, сывлăх сыхлавĕн, вĕрентĕвĕн тытăмĕсене аталантарасси тата модернизацилесси» пулса тăрать.
Михаил Игнатьев 2015 çулхи авăн уйăхĕнчи суйлавра унăн кандидатурине ырланăшăн тав тунă. Пĕрлехи суйлав кунĕн пĕтĕмлетĕвĕсем Чăваш Ен халăхĕ социаллă политикăна тĕрĕс тытса пынине, экономика тивĕçлĕ аталаннине, нацисемпе тĕнсем хушшинчи çыхăнусем çирĕпленсе пынине шаннине палăртаççĕ.
Чăваш Ен Пуçлăхĕ Михаил Игнатьев республикăн социаллă пурнăçĕпе экономика аталанăвне тĕплĕн тишкернĕ, малашлăха палăртнă.
Ĕç çыннине пулăшса пырасси, ăна хаклани, республикăри амăшĕн капиталне сыхласа хăварасси, çынсен сывлăхĕшĕн тăрăшасси, сывлăх сыхлавĕн çĕнĕлĕхĕсене пурнăçа кĕртесси, вĕренÿ пахалăхне лайăхлатасси, çынсене сывă пурнăç йĕркине тытса пыма ытларах явăçтарасси, ĕç тухăçлăхне, ĕç укçине ÿстересси, вак тата вăтам бизнеса аталантарасси, кăçалхи суйлавсем тата ытти ыйтусем Çырура паллă вырăн тупнă.
Çырăва пухăннисем хапăл туса йышăннă. Ăна вĕçленĕ май республика Пуçлăхĕ Михаил Игнатьев «Пирĕн ачасемпе мăнуксем пирĕн ĕçсен результачĕсемпе мухтанма пултарччăр тесе пĕтĕмпех тăвар», - тесе палăртни ĕçлеме хавхалантарать.
Аса илтеретпĕр: Çырăвăн телеверсийĕпе «Россия 1» телеканалăн регионти «События недели» программинче кăрлачăн 31-мĕшĕнче 10 сехет те 20 минутра паллашма пулать.