22 августа 2015 г.
Виçĕ çул каялла Аслă Пăла Тимеш çамрăкĕ Андрей Васильев юхăннă ялхуçалăх кооперативĕ вырăнне «Энтепе» сахал яваплă общество йĕркелесен Кивĕ тата Çĕнĕ Арланкасси, Энтепе ялĕсенче пурăнакансем çăмăллăн сывласа ячĕç.
Паллах, пĕтĕм ĕçе çĕнĕрен йĕркелесе яма çăмăл пулмарĕ Шупашкарти кооператив институтĕнче менеджера вĕреннĕ Андрей Петровича. Çапах мĕн пĕчĕкрен ялта ÿснĕ çамрăка хăратмарĕ хресчен ĕçĕ.
Ял çынни ĕмĕртен ĕне выльăх усранипе пурăнать. Сĕте шурă ылтăн тесе ахальтен каламанах. Çавăнпа та ертÿçĕ чи малтанах ĕнесем туянма шухăшларĕ, кивĕ, юхăннă витесене юсама пикенчĕ, çĕнни тума ĕмĕтленчĕ. Вăл киличчен фермăра пĕр пуç ĕне те юлман. 2013 çулта хуçалăхра 200 ĕне вырнаçмалăх вите хута кайрĕ. «Прогресс» АХОран, Комсомольски районĕнчи «Восток» хуçалăхран ăратлă ĕнесем туянса килчĕ.
Халĕ кунта 243 пуç сăвăнакан ĕне. Вĕсене çурхи хĕвел пăхма пуçласанах çуллахи лагере кăларнă та паян та унтах. Хальхи вăхăтра Л.Батанова, В.Михайлова, В.Евграфова дояркăсем кашни ĕнерен куллен 18 килограмм сĕт сăваççĕ. 7 уйăхра кашни ĕнерен 3641 килограмм сĕт суса илнĕ, ку кăтарту иртнĕ çулхи çак вăхăтринчен 267 килограмм пысăкрах. Ĕнесене ытлă-çитлĕ тăрантараççĕ. Вĕсене çитерме 150 гектар нумай çул ÿсекен курăк уйăрнă. Р.Галиев, Н.Воронцов кĕтÿçсем ĕнесене уя илсе тухаççĕ. Çавăн пекех çулса çитерессине те йĕркеленĕ. Н.Ахмадуллин тракторист ĕнесем патне симĕс курăк турттарать. Кăçал 2 гектар çинче карта тытса çавăрнă. Çумăрлă çанталăкра ĕнесем тăрă айĕнче тăраççĕ, ăна кăçал ятарласа тунă. Шыв пăрăх тăрăх пырать. Пахалăхлă сĕте тÿрех холодильнике яраççĕ. Ăна Елчĕкри сĕт-çу заводне ăсатаççĕ.
- Ĕнесем умĕнчен апат татăлмасть. Уйрăмах судан курăкне кăмăллаççĕ. Унта сахăр нумай. Иккĕмĕш çул акса илетпĕр ăна. Пĕлтĕр тăватă хутчен çултăмăр, кăçал та тухăçпа савăнтарать, - тет А.Васильев ертÿçĕ.
Хуçалăхра хальлĕхе 430 тонна утă, 1500 тонна сенаж хатĕрленĕ. 100 гектар çинчи кукуруза ăнса çитĕннĕ, унран силос хываççĕ. Выльăх апачĕ хатĕрленĕ çĕрте В.Мязейкин, Р.Саматов механизаторсем тăрăшаççĕ. Кăçал хуçалăх выльăх апачĕ хатĕрлекен «Дон-680» комбайн туяннă.
Фермăра çеç мар, тырпул пухса кĕртесси те кал-кал пыни савăнтарать. Юлашки вăхăтра çумăрлă çанталăк тăни вырма ĕçĕсенче чăрмав кÿчĕ пулин те хĕвел пăхма пуçласанах В.Клементьев, О.Михеев комбайнерсем «уй-хир карапĕсене» хускатса хире васкаççĕ. Хуçалăхра 516 гектар çинчен пĕрчĕллĕ тата пăрçа йышши культурăсене пухса кĕртмелле. Тата 80 гектар çинчи урпана çапса илмелли юлнă. Л.Садовников водитель ГАЗ-53 автомашинăпа тырă турттарать. Йĕтем çинчи мĕнпур ĕçе КЗС заведующийĕ А.Михеев йĕркелесе тăрать. А.Ахметсафин тракторист кĕрхи культурăсем акма 200 гектар çĕр хатĕрленĕ.
В.Кириллова сăнÿкерчĕкĕнче: А.Васильев ертÿçĕпе Н.Воронцов кĕтÿçĕ.