Публикации » Константин КОСАЧЕВ: "Çак туйăм-туртăм тата вăйлăрах пулĕ…" "("Елчĕк Ен")

28 марта 2015 г.

РФ Федераци Канашĕн Ют çĕршыв ĕçĕсен комитечĕн председателĕн Константин Косачевăн Чăваш Республикинчи ĕçлĕ çулçỹревĕнче пĕр пушă самант та пулмарĕ тесен тĕрĕсрех те. Чукун çул вокзалĕнче кĕтсе илнĕ хыççăнах Константин Иосифович çамрăксемпе тĕл пулма васкарĕ. И.Я.Яковлев ячĕллĕ Чăваш педагогика университечĕн студенчĕсем хаклă хăнана алă çупса кĕтсе илчĕç. Сенатор çак аслă шкулта пĕрремĕш хут мар. Унăн пулăшăвĕпе кунта пысăк тĕрлĕ ĕç нумай туса ирттернĕ. Сăмахран, университетри бассейн та вăл çине тăнипех хута кайнă. Корпуссене, аудиторисене юсаса хăтлăлатнă, тĕрлĕ оборудовани туяннă.

Константин Иосифович педагогика университечĕн коллективне малашнехи ĕçре, вĕренỹре ăнăçу, ăнтăлу сунса республикăн экономикине аталантарма тăрăшакансем патне - предприятисене васкарĕ.

"Чăвашкабель" завод" акционерсен уçă обществинче К.Косачев малтанах предприяти ертỹлĕхĕпе тĕл пулса канашларĕ, унтан цехсенче пулса производство технологийĕпе паллашрĕ. Кăçал завод хăйĕн потребителĕсем патне 2,3 млрд ытла тенкĕлĕх продукци ăсатма хатĕрленет.

Авиаци тата космос промышленноçĕ валли кабель кăларакан цехра К.Косачев предприятин техника директорĕпе А.Кутовпа тата ĕç тăвакан директорăн заместителĕпе Д.Васильевпа уйрăммăн тĕл пулчĕ. Ыйтусем хальхи производствăна аталантарассипе, продукцие ют патшалăхсене ытларах ăсатассипе çыхăннă. РФ Федераци Канашĕн Ют çĕршывсен ĕçĕсен комитечĕн председателĕ çакăнпа тĕплĕ ĕçлеме килĕшнине пĕлтерчĕ.

К.Косачев пулса курнă тепĕр предприятин - "Шупашкарти электроаппаратура завочĕ" акционерсен хупă обществин кăтартăвĕсем те ỹсĕмлĕ. Предприяти пĕлтĕр продукци 2950 млн тенкĕлĕх ăсатнă. Кăçалхи январь-февраль уйăхĕсенче кăна - 333,4 млн тенкĕлĕх. Завод кăларакан комплектлă трансформатор подстанцийĕсене, комплектлă виçе тата пĕчĕк вольтлă устройствăсене, хỹтĕлев автоматикин системисене, мини-контакторсене чылай отрасль хапăлласа туянать.

Журналистсемпе тĕл пулнă чухне Константин Косачев çĕршывăмăр хăватне унăн регионĕсем ỹстернине çирĕплетрĕ. Çакăнта Чăваш Республикин тỹпи те пысăккине палăртрĕ: "Чăваш Ен - федерацин Атăлçи регионĕнчи лайăх аталанса пыракан субъекчĕсенчен пĕри. Кунта аталану тата ỹсĕм политики ăнăçлă ĕçлет. Республика халăхĕ хăй те - ĕçчен, маттур, пултаруллă. Ертỹлĕхĕ пирки те çавнах каламалла. Тата питĕ тĕрĕс халăх кунта. Ку - республикăн ыттисен умĕнче мала тухмалли конкурентлăх палли. Тăван республикăна яланах пысăк кăмăлпа килсе çỹренĕ, пулăшма тăрăшнă. Çак туртăм-туйăм малашне тата вăйлăрах пулĕ".

Тĕлпулăва вĕçлесе вăл çитес суйлавра республика халăхĕ тĕрĕс йышăну тăвасса шанни çинчен пĕлтерчĕ.

Константин Косачев сенатор Чăваш Республикин Пуçлăхĕпе Михаил Игнатьевпа тĕл пулнă.

("Хыпар" хаçатран).