11 марта 2015 г.
Мартăн 7-мĕшĕнче пирĕн районта ĕçлĕ визитпа Чăваш Республикин Пуçлăхĕ М.Игнатьев пулнă. Район администрацийĕн пысăк залĕнче вăл Депутатсен пухăвĕн депутачĕсемпе, ял тăрăхĕсен депутачĕсемпе тата пуçлăхĕсемпе, предприятисемпе организацисен ертỹçисемпе, районăн хисеплĕ çыннисемпе тĕл пулнă. Тĕлпулăва район ертỹçисем Р.Молодова тата Н.Миллин, Чăваш Республикин экономика аталанăвĕн, промышленноç тата суту-илỹ министрĕ В.Аврелькин, вĕренỹ тата çамрăксен политикин министрĕн пĕрремĕш çумĕ С.Петрова, Чăваш Республикин Патшалăх Канашĕн депутачĕсем П.Красновпа К.Мифтахутдинов хутшăннă.
Чи малтанах Чăваш Республикин Пуçлăхĕ М.Игнатьев залра ларакан хĕрарăмсене Мартăн 8-мĕшĕ ячĕпе ăшшăн саламларĕ. Елчĕк ялĕнче пурăнакан хĕрарăмсене, Аттелĕхĕн Аслă вăрçин тыл ветеранĕсене К.Я.Щипцовăна, К.Е.Волковăна, В.М.Гаврушовăна, Л.М.Ишмуратовăна, Л.И.Чистовăна, Л.Е.Черновăна Раççей Федерацийĕн Президенчĕн Указĕпе çирĕплетнĕ "Аттелĕхĕн Аслă вăрçинче Çĕнтерỹ тунăранпа 70 çул" юбилей медалĕсемпе чысларĕ.
Канашлура 2015 çулхи район бюджетне шайлаштарас, çавăн пекех кризис вăхăтĕнче экономикăна пĕр тăнăçлă аталантарас тата социаллă çирĕплĕхпе тивĕçтерес ыйтусене пăхса тухрĕç.
Район активĕ умĕнче тухса калаçнă май Михаил Игнатьев çакна палăртрĕ: Раççей экономики хальхи вăхăтра çăмăл мар лару-тăрура. Çакă Чăваш Республикин Правительствине республикăн пĕрлештернĕ бюджетне тепĕр хут пăхса тухма хистет. Çавна май район тата ял тăрăхĕсен бюджечĕсене те тепĕр хут пăхса тухма тивет. Кăçал налукран тата налукран мар кĕрекен тупăшсем малтан палăртнинчен сахалрах пуçтарăнма пултарассине шута илсе çĕнĕ инвестици проекчĕсене май килнĕ таран пурнăçлама тытăнмалла мар. Пуçăннă проектсене пурнăçлассинче те хăш проектсем чи пĕлтерĕшлисене, хăшĕсене каярахри вăхăта хăварма май пуррине палăртмалла. Раççей Президенчĕ В.В.Путин 2012 çулхи май уйăхĕнчи Указĕпе палăртнă бюджет сферинче ĕçлекенсем умĕнчи обязательствăсене пурнăçламалла.
"Малтан шутласа пăхнă тăрăх кăçал инфляци пысăк пулма, бюджет сферинче ĕçлекенсен тупăшĕ чакма пултарать. Пĕр-икĕ çул чăтма тивет. Ялта пурăнакансене апат-çимĕç продукчĕсем ỹсни ытлашши хăратмалла мар, мĕншĕн тесен ял çыннисем пахча çимĕçне, улма-çырлине хăйсем çитĕнтереççĕ, выльăх-чĕрлĕх ĕрчетеççĕ, хĕл валли апат-çимĕç хатĕрлеççĕ", - терĕ Михаил Игнатьев. Çапла, ялта кризис палăрмалла та мар. Пĕтĕмпех хамăртан килет вĕт. Çапах та Республика Пуçлăхĕ каланине шута илмеллех: "Лару-тăрăва хитрелетсе ан кăтартăр, реалистсем пулăр", - терĕ вăл.
Елчĕк районĕнчи экономика аталанăвне хак панă май Михаил Игнатьев хуçалăхăн мĕнпур формине аталантарса пынине, унăн потенциалĕ пысăк пулнине палăртрĕ.
В.Аврелькин министр та кризис района сахал пырса тивнине, районти ял хуçалăх предприятийĕсем тупăшпа ĕçленине, ĕç укçи ỹснине, район ĕçлĕ ăмăртура юлашки виçĕ çулта тăтăшах пĕрремĕш вырăна йышăнса пынине каларĕ. В.Аврелькин республикăра кризиса хирĕç кĕрешмелли планпа паллаштарчĕ.
Районти финанс пайĕн начальникĕ Г.Анисимова пĕлтернĕ тăрăх налук шутне кĕмен тупăшсем юлашки икĕ çулта ỹссе пынă, кăçалхи икĕ уйăхра 101 процентпа танлашнă. Уйрăм çынран илекен налук кăçал пĕлтĕрхинчен пĕчĕкрех пулма пултарать. Çавна май вăл тăкаксене чакармалли çул-йĕр çинче чарăнса тăчĕ.
Район администрацийĕн пуçлăхĕ Н.Миллин район экономикипе социаллă аталанăвне кĕскен тишкернĕ май, ял хуçалăхĕнчи ырă улшăнусене асăнчĕ. 2013 çулта сăвакан ĕнесен хисепне 507 пуç, 2014 çулта 117 пуç, сыснасене 1300 пуç ỹстерни, кăçал сăвакан ĕнесене 200 пуç ытларах усрама пăхни ял хуçалăх предприятийĕсене тупăша ỹстерме, çĕнĕ ĕç вырăнĕсем уçма май панине палăртрĕ.
Елчĕкри сĕт-çу завочĕ вăй илсе пыни, юсавпа техника предприятийĕнчи юсав цехне илнĕ предприниматель продукци кăларма тытăнни район бюджетне пуянлатма, çĕнĕ ĕç вырăнĕсем йĕркелеме май парать. Николай Петрович килти хуçалăхра выльăх-чĕрлĕх ытларах усрани, çапла майпа хамăра хамăр аш-какайпа тивĕçтерме, ытлашшине сутса укçа-тенкĕ ĕçлесе илме май панине палăртрĕ. Район администрацийĕн пуçлăхĕ республика района нумай пулăшнине те асăнчĕ. Çавна май юлашки çулсенче çеç Аслă Таяпа, Кĕçĕн Таяпа çулĕсене тĕпрен юсанă, район центрĕнче çĕнĕ ача сачĕ тунă, Кĕçĕн Таяпара тата Элпуçĕнче фельдшерпа акушер пункчĕсем ĕçе кĕртнĕ, кăçал Тĕмерте çĕнĕ ФАП туса лартаççĕ, тата ытти нумай ĕç пурнăçланă. Пухăва хутшăннисем района аталантарма пысăк пулăшу панăшăн Чăваш Республикин Пуçлăхне Михаил Игнатьева чĕререн тав турĕç.
ЧР вĕренỹ тата çамрăксен политикин министрĕн çумĕ С.Петрова вĕрентỹ ĕçĕнче Елчĕк районĕ малта пынине ырăпа асăнчĕ. Шкулсене юсама çулсерен укçа уйăраççĕ, вĕренекенсем республикăри, çĕршыври предмет олимпиадисенче палăраççĕ. Елчĕк районĕнче шкул çулне çитмен ачасен 76 проценчĕ ача сачĕсене çỹрет. Çаксем республикăри чи лайăх кăтартусем шутланаççĕ.
ЧР Патшалăх Канашĕн депутачĕ П.Краснов Елчĕк районĕн иртнĕ çулсенчи ĕçĕ-хĕлне тишкернĕ май нумай лайăх пулăма асăнчĕ: районăн хăйĕн тупăшĕ ытти районсенчен чылай пысăкрах. Çакă куçман пурлăха сутнипе кăна мар, арендăна панипе, налуксене вăхăтра пуçтарнипе пулнă.
"Газпром межрегионгаз Чебоксары" ООО генеральнăй директорĕ, ЧР Патшалăх Канашăн депутачĕ К.Мифтахутдинов экономика кризисĕн вăхăтĕнче перекетлĕрех пулмаллине, бюджет укçи-тенкипе тухăçлă усă курмаллине аса илтерчĕ. Пĕрле тăрăшсан пĕтĕм йывăрлăхсене çĕнтерессе шанса тăнине пĕлтерчĕ.
Н.АЛЕКСЕЕВ.
Сăнỹкерчĕксем cap.ru сайтран.
Источник: "Елчĕк Ен"