07 марта 2015 г.
Хăват, вăй-хал парса тăратăн, малаш, пуласлăх сансăр çук.
Арçынпала пĕр тан туртатăн лава - ĕçре сан пурнăçу...
"Победа" ОООри ĕне фермин коллективĕ иртнĕ çул пĕр ĕнерен 7095 килограмм сĕт сунă, çапла майпа районти чи пысăк кăтартăва çывхартнă. Анна Константиновăна çирĕплетсе панă ĕнесем тата ытларах - 7280 килограмм сĕт антарнă. Ял хуçалăх предприятийĕнче кăçалхи 2 уйăхри тапхăрта та пĕр ĕнерен 1053 килограмм сĕт сума пултарни ферма коллективĕ мал ĕмĕт-тĕллевлĕ пулнине çирĕплетет.
Дояркăсем - Анна Константинова, Елена Портнова тата Татьяна Веникова пысăк кăтартусем ĕне выльăхсене çулталăк тăршшĕпех тулăх апатпа тăрантарнипе тата çĕнĕ технологисемпе усă курса ĕçе тухăçлă йĕркеленипе пулнине палăртаççĕ. Ĕнесене хĕлĕн-çăвĕн 3 хутчен суни те сăвăма ỹстерме пулăшать. Умран юличчен пахалăхлă апатпа тăрантаракан, хăтлă витесене вырнаçтарнă пур ушкăнсенчи мăйракаллă шултăра выльăхсем те самăр çитĕнеççĕ.
Ăнăçлăх, паллах, фермăра тăрăшакансенчен те нумай килет - пĕрин ĕçĕ теприн ĕçĕпе тачă çыхăннă. Выльăх-чĕрлĕх пăхаканăн яваплăхĕ, чăннипех, пысăк. Пăрулаттаракан уйрăмри Валентина Показаньевăпа Елена Челякова ĕнесене пăрулама хатĕрлеççĕ, пăрусене йышăнаççĕ. Пирвайхи сĕте вăхăтлă ĕмĕртме ĕлкĕртесси те вĕсен ĕçĕнче тĕп вырăн йышăнать. 10 кунран иртнĕ пăрусене пăхакан Татьяна Платонован яваплăхĕ пĕчĕк-и? Пĕчĕкскерсене, куç шăрçине упранă пек сыхламалла, ветеринарипе санитари йĕркисене çирĕп пăхăнса ĕçлемелле. Раиса Дмитриева пăрусене 2 уйăхран пуçласа 4 уйăха çитиччен çитĕнтерет. Çак вăхăтра çамрăк пăрусем шăпах симĕс утă-курăк çиме хăнăхаççĕ. Вĕсене пахалăхлă çемçе утăпа анчах тăрантарма юранине те шута илмелле. Ял хуçалăх предприятийĕнче ятарласа çамрăк ĕне пăрусене çитерме тесе, çанталăк условийĕсене пăхмасăр, кашни çул кирлĕ таран пахалăхлă симĕс утă хатĕрлесе хăварассине малти вырăна хураççĕ.
Нумай çул фермăра ĕçлесе пысăк ăсталăх пухнă, çамрăксене ырă тĕслĕх кăтартакан Маргарита Курицынăна ĕне тума хатĕрлекен ушкăнри тына пăрусене тата самăртакан ушкăна куçарма хатĕрлекен вăкăрсене çирĕплетсе панă. Вĕсем нумай сĕт антаракан, лайăх ĕнесем пулччăр тата вăкăрсем самăр çитĕнччĕр тесе вăл чун-чĕре ăшшине парать. Мăйракаллă шултăра выльăхсене самăртнă çĕрте тăрăшакан Надежда Андреева кỹршĕллĕ Кушкă ялĕнчен ĕçе çỹрет. Галина Трофимова тĕп зоотехникпа иккĕшĕ вĕсем куллен Аслă Пăла Тимешри ферма çулне такăрлатаççĕ. Сăмах май, "Победа" ОООра хальхи вăхăтра Кушкă ялĕнчи 7 çын яланлăх ĕç вырăнĕ тупнă. Тивĕçлĕ ĕçшĕн тивĕçлĕ шалу тỹлекен ял хуçалăх предприятийĕнче хавхалануллă кăмăл-туйăмпа ĕçе пикенме сăлтав пур.
Зинаида Свекловăпа Валентина Никитина тына пăрусене пĕтĕлентернĕ çĕрте тăрăшаççĕ, Ираида Московскаяпа Елена Сергеева, Светлана Чермаковăпа Галина Глинина, Любовь Жирновăпа Валентина Кудрявцева сменăпа фермăри ытти тĕрлĕ ĕçсене пурнăçлама хутшăнаççĕ. Вера Чернова - ĕне сутаракан оператор. Халĕ вăл декретлă отпускра. Марина Портнова сăвакан зала тирпейлет-тасатать. Надежда Цыгановăпа Елена Пчелова - кладовщицăсем. Светлана Алексеева - медицина сестри, вăл рейса каякан водительсемпе механизаторсен сывлăхне тĕрĕслет. Таисия Баранова нумай çул тăван хуçалăхăн ферминче ĕçленĕ, тивĕçлĕ канăва тухнă хыççăн администраци çуртĕнче техслужащи пулса тăрăшать. Ял хуçалăх производствин яваплă участокĕсенче вăй хуракан хĕрарăмсем пирки ăшă сăмах пуçарнă май нумай çул дояркăра ĕçлесе тивĕçлĕ канăва тухнă Зоя Емельяновăпа Наталия Портнова ячĕсене аса илменни тĕрĕс мар пулĕччĕ. Мĕншĕн тесен вĕсем те хуçалăх аталанăвĕнче хăйсен тивĕçлĕ тỹпине хывнă.
Ферма хĕрĕсен ĕç условийĕсемпе те кăмăлсăр пулма сăлтав çук. Кунти фермăсене темиçе çул каяллах тĕнче шайĕнчи стандартсемпе килĕшỹллĕн реконструкци тунă, ĕнесене ятарлă залра сăваççĕ. 20-30 çул каялла фермăра дояркăра ĕçленĕ çынсене кунта килсе кăтартас пулсан вĕсем тĕлĕнмеллипех тĕлĕнме пултарĕç. Çуллахи лагерьти ĕç условийĕсем те, малтанхи вăхăтрипе танлаштарсан, нумай лайăхланнă. Хĕрарăмсен ĕçне ансатлатасси çине ял хуçалăх предприятийĕн дирекцийĕ пысăк тимлĕх уйăрать...
С.АРХИПОВА сăнỹкерчĕкĕнче: Мăйракаллă шултăра выльăхсене тĕрлĕ ушкăнсенче пăхакан хĕрарăмсем, вĕсен ĕç тумтирĕсем пурин те пĕр пек.
Источник: "Елчĕк Ен"