13 августа 2014 г.
.jpg "Яваплăха туйса тимлеççĕ (\"Елчĕк Ен\")")
"Победа" сахал яваплă юлташлăхра пĕрчĕллĕ тата пăрçа йышши культурăсене юлашки гектарсем çинчен çапса тĕшĕлеççĕ. Хальхи вăхăтра пухса кĕртекен "Эльф" тулă 190 гектар çинче çитĕннĕ.
Шăрăх çанталăк условийĕсене пăхмасăр, уй-хирте тыр-пул япăх мар çитĕннĕ. Бункер виçипе шутласан, кашни гектартан вăл 26-27 центнертан кая мар тухать. Урпа тата тухăçлăрах çитĕннĕ - 30 центнер ытла. Ỹсĕмсен вăрттăнлăхĕ мĕнре? Николай Головин директор ыйту çине татăклă хурав пачĕ:
- Пĕрчĕллĕ тата пăрçа йышши культурăсен ытларах пайне çĕнĕ йышши ака комплексĕпе (К-744Р2 трактор тата "Агратор-8500" сеялка) акни агротехника йĕркине çирĕп пăхăнса ĕçлеме май пачĕ. Хальхи вăхăтра хăватлă техникăсăр продукци туса илессине те, унăн пахалăхне те ỹстерме май çук. Паллах, ỹсĕмсен вăрттăнлăхĕ - тĕш тырра лайăх вăрлăхсемпе, минераллă удобренисемпе усă курса акнинче тата калчасем шăтса тухнă хыççăн тĕрлĕ чир-чĕре тата çум курăксене хирĕç кĕрешсе кирлĕ им-çамсене вăхăтра сапнинче тесе шутлатпăр, - тет вăл.
Ял хуçалăх предприятийĕнчи тыр-пула çапса тĕшĕлеме икĕ комбайн хутшăнать. Пĕри - "Палессе - 812", тепри - кăçал анчах туяннă "АГРОС-540". Асăннă йышши техникăсен ĕç тухăçлăхĕ пысăк. Вырма ĕçĕсем кал-кал пынипе "уй-хир карапĕсен" хуçисем - Вячеслав тата Иван Овечкинсем (вĕсем - пĕр тăвансем), тырра комбайнсем патĕнчен йĕтеме турттаракан водительсем - Сергей Чернов, Владимир Смирнов тата Владимир Козлов та хавхалануллă шухăш-кăмăллă. Çапла пулмасăр, алла мĕн чухлĕ шалу илесси пĕтĕмпех ĕç тухăçлăхĕнчен, кашни кунхи ĕçе хăйсем мĕнле йĕркелесе пыма пултарнинчен килнине лайăх ăнланаççĕ вĕсем. Районĕпе илсен кăçалхи 6 уйăхра та чи пысăк ĕç укçи тỹлеме пултарнă "Победа" ООО хăйĕн тăрăшаканĕсене черетлĕ ĕç çи тапхăрĕнче те лайăх ĕçленĕшĕн уйрăм расценкăсемпе тỹлеме палăртнă. Апла пулсан, хавхалану пулмаллах.
Уй-хирти ытти ĕçсем те кал-кал пыраççĕ: пушаннă лаптăксенчи улăма рулонсене хываççĕ, кĕрхи çĕртме сухи тăваççĕ. Кĕр тыррисене акма агротехника ыйтнипе килĕшỹллĕн чи кĕске вăхăтра 200 гектар çĕр хатĕрленĕ. Çак ĕçсене пурнăçлама Анатолий Алексеева шанса панă.
Фермăсенчи выльăх-чĕрлĕх те хĕл кунĕсенче тутă пулмалла. Çанталăк условийĕсене пăхмасăр çителĕклĕ таран пахалăхлă утă, сенажа кирлинчен те ытлашшипех хывса хăварнă. Унпа пĕрлех, ял хуçалăх предприятийĕнче тăрăшакансене те çителĕклĕ таран утă-улăмпа тивĕçтернĕ, тырă та валеçме тытăнасшăн. Ял çыннине тулăх пурăнма тата урăх мĕн кирлĕ? Ĕç пурне те тăрантарать...
Светлана АРХИПОВА.