16 июля 2014 г.
Агропромышленность комплексĕн ĕçченĕсен профсоюзĕн Чăваш Республикинчи комитечĕн президиумĕн ларăвне пирĕн районти "Победа" ОООра ирттерни ыт ахальтен мар.
Реском председателĕ А.Смирнов, лару ĕçне хутшăннă район администрацийĕн пуçлăхĕ Н.Миллин тата ытти тухса калаçакансем çĕнĕ технологисемпе анлăн усă куракан, çавна май ĕç условийĕсем, унпа пĕрлех пурнăç шайĕ те çулсерен лайăх енне улшăнса пыракан асăннă ял хуçалăх предприятийĕнче çак мероприятие ирттерни вырăнлă пулнине палăртрĕç. Курмалли, вĕренмелли кунта, чăннипех, нумай. Н.Головин директор производство кăтартăвĕсемпе кĕскен паллаштарнă хыççăн тĕп ыйту - çынсене тăрăшса ĕçлеме лайăх условисем туса парасси тата хăрушсăрлăх йĕркисене пăхăнса ĕçлесси çинчен тĕплĕн чарăнса тăчĕ.
Ял хуçалăх производствинче çĕнĕ технологисемпе анлăн усă куракан, ĕçе тухăçлă йĕркеленине кура тивĕçлĕ шайри шалу тата ăна вăхăтра тỹлекен "Победа" ОООна кирек кам та пырса ĕçлеме килĕшмелле. Механизаторсем паян кондиционер, радиоприемник вырнаçтарнă, мотор шавĕ те хăлхана кĕмен хăватлă комбайнсемпе тракторсен кабинисенче ларса ĕçлеççĕ. Кашни çынна ятарлă ĕç тумтирĕпе тивĕçтернĕ. Çур акире, выльăх апачĕ хатĕрленĕ тапхăрта, вырмара палăртнинчен ытларах ĕçленĕшĕн вĕсене уйрăм расценкăсемпе тỹлемелли хушма условисем çирĕплетнĕ. Апат та тỹлевсĕр, ăна кунне икĕ хутчен хире илсе тухсах çитереççĕ. Хĕрỹ тапхăрта механизаторсен уйăхри вăтам шалăвĕ 25-30 пин тенкĕрен кая мар. Çавна май вĕсем тĕнче тăрăх "вăрăм" укçа шыраса çỹремеççĕ, пикенсе вăй хурсан ăна вырăнтах ĕçлесе илме пулнине çирĕплетеççĕ. Шанăçа тивĕçлипе тỹрре кăларма пултарнă кỹршĕ ялсенчи механизаторсене те кунта яланлăха ĕçе илнĕ, çакăншăн вĕсем питех те кăмăллă пулнине пĕлтереççĕ. Фермăра тăрăшакансен хавхаланăвĕ те пысăк - кашни уйăхри ĕç кăтартăвĕсене пĕтĕмлетнĕ хыççăн палăртнинчен ытларах продукци туса илнĕшĕн 10 процентран пуçласа 50 процент таран хушса тỹлесси йăлана кĕнĕ. Иртнĕ çул пĕр ĕнерен 7085 килограмм, кăçалхи 6 уйăхра 3815 килограмм сĕт сунă, хальхи вăхăтра ĕне выльăхсене пĕр талăкра 1000 грамм ытла ỹт хуштаракан ĕне сăвакан тата мăйракаллă шултăра выльăхсене самăртакан операторсен шалăвĕ те пĕчĕк марри каламасăрах паллă. Сăмах май, пысăк кăтартусемпе ĕçлекен ял хуçалăх предприятийĕнче пĕр çын пуçне шутласан вăтам ĕç укçи иртнĕ çул районта чи пысăкки пулнă - 13398 тенкĕ. Кăçалхи 6 уйăхри вăтам шалу 14197 тенкĕпе танлашать.
Вырма пуçланиччен шутлă кунсем юлчĕç. Çавна май комбайнсене тата ытти техникăна çỹретме ирĕк панă, медицина тĕрĕслевĕ витĕр тухнă, ĕç сыхлавĕ енĕпе инструктаж илнĕ, йĕтемсенчи машинăсемпе агрегатсене ĕçлеттерме те ятарласа вĕреннĕ çынсене анчах çирĕплетнĕ. Уй-хирте ĕçлекен техникăсене пушартан сыхланмалли хатĕрсемпе, медицина аптечкисемпе тивĕçтернĕ.
Çамрăк специалистсене хавхалантарассине те тĕп вырăна хураççĕ. Вĕсене тивĕçлĕ ĕç укçи çирĕплетнипе пĕр вăхăтрах каялла тавăрса памалла мар пĕр хутчен 30 пин тенкĕ укçа уйăраççĕ. Аякран килнисене пурăнмалли çурт-йĕрпе тивĕçтереççĕ. Хальхи пурнăçра çакăн пек ырлăх тата ăçта пур? "Победа" ООО директорĕ Н.Головин çын нушине ăнланать, инкеке лекнисене пулăшассине чун тивĕçĕ тесе шутлать. Политикăри лару-тăру çивĕчленсе çитнĕ май, Украина çĕр-шывĕнчен Чăваш Ене тарса килекен 10 çемьене паян тесен паян çурт-йĕр туянса пама тата ял хуçалăх предприятине ĕçе вырнаçтарма хирĕç пулманнине пĕлтерет.
Техника паркĕнчи ĕç сыхлавĕн пỹлĕмĕнче тата ĕçрен пушă вăхăтра фермăри канмалли çуртра пулса курма та кăмăллă. Хĕрỹ ĕç çи вăхăтĕнче ют ялсенчен килсе ĕçлекен çынсене вăхăтлăха пурăнма ирĕк паракан пысăк пỹлĕмре килтинчен кая мар хăтлăх хуçаланать. Кунтах - столовăй, ăна тултан та, шалтан та çĕнĕ йышши материалсемпе усă курса юсанă, тирпей-илем кĕртнĕ.
Ял хуçалăх предприятийĕн дирекцийĕпе профсоюзăн вырăнти комитечĕ тăрăшнипе кунта ĕçлекенсем пушă вăхăта та усăллă ирттерме хăнăхнă. Ĕçченсен сывлăхне çирĕплетес тĕллевпе санаторисене кайма путевкăсем уйăрса парассине, малта пыракансене, тивĕçлĕ канăва тухнисене чыслассине малти вырăна хураççĕ. Çын ĕçне тивĕçлипе хаклани юлашкинчен пулакан ĕç кăтартăвĕсенче палăрать...
Светлана АРХИПОВА.
Ĕçченсем хăтлă столовăйра тутлă апатпа сăйланаççĕ.