09 июля 2014 г.
Иртнĕ ĕмĕрте çĕр-шывра, республикăра, районта "Победа" колхоз чапĕ чăннипех палăрнă. Ленин орденлă хуçалăхăн Аслă Пăла Тимешри комплекслă бригадине Социализмла Ĕç Паттăрĕ Иван Алексеевич Михайловский ертсе пынă. Ленин, Октябрьти революци, Хисеп Палли орденсен кавалерне халăх манмасть - унăн ячĕпе çулсеренех футбол турнирне ирттерет.
Кăçалхи 8-мĕш турнирта хамăр районти Аслă Пăла Тимешрен 3 команда, Акчел, Кушкă, Аслă Елчĕк, Лаш Таяпа, Кавал ялĕсен, кỹршĕри Комсомольски районĕнчен Хирти Сĕнтĕр тата Шупашкарти 4-мĕш юсану колонийĕн футболисчĕсем хăйсен ăсталăхне кăтартрĕç.
Ятарлă кубока çĕнсе илессишĕн ăмăрту çивĕч пулчĕ. Командăсем икĕ ушкăна пайланса вылярĕç. Пĕрремĕш çурма финалта Аслă Пăла Тимешсемпе Шупашкарсем тĕл пулчĕç. Тĕп вăхăтра çĕнтерỹçĕне палăртаймарĕç. Пенальтипе Аслă Пăла Тимешсем финала тухрĕç. Иккĕмĕш çурма финалта тĕл пулнă "Юман" командăпа Акчел ялĕн футболисчĕсем хушшинчи кĕрешỹ 0:2 шутпа вĕçленчĕ.
Финалта куçса çỹрекен кубокшăн Акчелсемпе Аслă Пăла Тимешсем тĕл пулчĕç. Кунта Акчелсем 1:0 шутпа çĕнтерчĕç. Иккĕмĕш вырăнта - Аслă Пăла Тимешсем, "Юман" команда - виççĕмĕш.
Вăйăсем вĕçленнĕ хыççăн чи лайăх вылякансене палăртрĕç. "Чи лайăх вратарь" ята Максим Цыганов (Аслă Пăла Тимеш) тивĕçрĕ. "Чи лайăх хỹтĕленсе вылякан" Сергей Васильев (Шупашкар), "Чи лайăх çурма хỹтĕленсе вылякан" - Алексей Самаков ("Юман",) "Чи лайăх бомбардир" - Николай Николаев (Акчел). "Чи лайăх тапăнса вылякан" ята тивĕçнĕ Владимир Викторов (Аслă Пăла Тимеш) Портновсен çемйи çирĕплетнĕ ятарлă приза та çĕнсе илчĕ.
Турнира йĕркелекенсем ăмăрту спонсорĕсене тав тăваççĕ.
А.КАРЛИН.
Сăн ỹкерчĕкр: И.А.Михайловский.