23 июня 2014 г.
Уй-хирте хĕрỹ вăхăт: выльăх апачĕ хатĕрлеççĕ. Курăка çулнă чухнех çемçетсе пыракан çĕнĕ йышши техника умран иртсе кайнă хыççăн тутлă шăршă сăмсана кăтăкларĕ, чунра ыррăн-ыррăн туйăнчĕ. Люцернăпа козлятник курăкĕнчен хатĕрленĕ паха сенажа ĕне выльăх хĕл кунĕсенче юратса çиесси паллă...
"Победа" сахал яваплă юлташлăхра кашни çулах çанталăк условийĕсене пăхмасăр фермăри выльăх-чĕрлĕхе хĕл кунĕсенче умран юличчен тăрантармалăх апат хатĕрлесе хăвараççĕ. Нумай çул ỹсекен курăксене пĕрремĕш хут çулнинченех 180 тонна утă, паянхи кун тĕлне 2000 тонна сенаж хатĕрлеме ĕлкĕрнине шута илес пулсан ял хуçалăх предприятийĕнче кăçал та пахалăхлă выльăх апачĕ ытлăн-çитлĕнех пуласса çирĕплетсе калама май пур. Апат пахалăхĕ ăна хăш вăхăтра хывса хăварнинчен нумай килет.
- Юлашки эрнери сỹрĕк, ăмăр çанталăкра сенаж хатĕрлеме шăпах меллĕ пулчĕ. Малтанхи вăхăтри пек шăрăх тăнă пулсан паккуссенчи çулса пăрахнă курăк ытлашши типсе каясран асăрханмаллаччĕ. Çавна май халĕ сенаж хатĕрлемелли технологие çирĕп пăхăнса ĕçлетпĕр, - тет Николай Головин директор.
Ял хуçалăх предприятийĕн уй-хирĕнче пĕр кивĕ техника кураймăн - вĕсем пурте çĕнĕ, хăватлă йышши. Выльăх апачĕ хатĕрлеме "ДОН-680" комбайн, КСУ-1 косилка, пысăк прицеплă 3 трактор харăсах хутшăнать. Механизаторсем те хăйсен ĕç условийĕсемпе кăмăллă пулни вĕсен сăн-питĕнченех паллă. Кивĕ, тĕрĕссипе усă курма та юрăхсăр пулнă ял хуçалăх машинисене вăхăтлăха "чун кĕртсе" хире илсе тухассишĕн миçе çул нушаланнине аса илес килмест пулин те ун чухне механизаторсем паянхи пек меллĕ, хăватлă техникăпа ĕçлесе курасса ĕмĕтленме те пултарайманнине пытармаççĕ. Ял хуçалăх предприятийĕнче тăрăшакансене тивĕçлĕ ĕç укçи тỹлени те пикенсе вăй хума хистет. Выльăх апачĕ хатĕрленĕ çĕрте палăртнинчен ытларах вăхăт ĕçленĕшĕн уйрăм расценкăсемпе тỹленине шутласан механизаторсен пĕр кунхи шалăвĕ 2000 тенкĕрен те иртет. Апат та тỹлевсĕр, ăна кунне икĕ хутчен хире илсе килсех çитереççĕ.
Иртнĕ çул пĕр ĕнерен 7085 килограмм, усă куракан 100 гектар çĕр пуçне шутласан та районĕпе чи нумай сĕт туса илнĕ, республикăри кăнтăр зонăри ял хуçалăх предприятийĕсем хушшинче пĕрремĕш вырăна тухнă "Победа" сахал яваплă юлташлăхри ỹсĕмсен вăрттăнлăхĕ, пирĕн шутпа, Николай Головин директорпа вăтам сыпăкри ертỹçĕсем ĕçе пĕлсе йĕркелесе пынипе, çĕнĕ технологисене анлăн ĕçе кĕртнипе çыхăннă.
Светлана АРХИПОВА.
Сăн ỹкерчĕкре: Н.Логинов, Н.Герасимов, Л.Портнов, А.Кошельков, С.Елисеев тата В.Козлов механизаторсем ĕç кал-кал пынипе кăмăллă.