22 апреля 2014 г.
"Победа" ОООра агротехника йĕркине çирĕп пăхăнса минераллă удобренипе апатлантарнă нумай çул ỹсекен курăксен, кĕрхи çĕртме лаптăкĕсенче нỹрĕк тытаççĕ. Уй-хирти ĕçсене пĕтĕмпех çĕнĕ йышши хăватлă техникăпа пурнăçлаççĕ.
Ана çине пĕрре кĕрсе 18 метр сарлакăшĕнче нỹрĕк тытакан "КАМА" йышши сỹрепе усă курни ĕçе тухăçлă йĕркелеме май панине хамăр куçсемпе курса ĕнентĕмĕр. Владимир Козлов механизаторăн кăмăл-туйăмĕ пушшех хавхалануллă. Çав вăхăтрах çĕнĕ йышши техникăпа ĕçлеме ахальтен мар хăйне çирĕплетнине, шанăçа тивĕçлипе тỹрре кăлармалла пулнине те лайăх ăнланать вăл. Василий Портнова кĕрхи çĕртме лаптăкĕнче нỹрĕк тытма çирĕплетнĕ. Александр Кошельковпа Сергей Елисеев механизаторсем те ака çинче тĕп ĕç вăйĕ пулса тăраççĕ.
Паянхи кун хăватлă техникăсăр продукци туса илессине те, унăн пахалăхне те ỹстерме май çук. "Победа" ООО директорĕ Николай Головин çакна лайăх ăнланать. Теветкеллĕ, мал ĕмĕтлĕ ертỹçĕ çине тăнипе ял хуçалăх предприятийĕнчи техника паркĕ юлашки çулсенче тĕпрен çĕнелсе улшăннă. Кунта ретпе вырнаçтарса тухнă çĕнĕ агрегатсене ялта пурăнакансенчен нумайăшĕ пуçласа курать. Нумаях пулмасть кỹрсе килнĕ ака комплексĕ те (К-744Р2 трактор тата "Агратор-8500 сеялка) хире тухма хатĕр. Асăннă хăватлă техникăна ĕçлеттерме тĕп инженер тивĕçĕсене пурнăçлакан Анатолий Алексеева шаннă.
Тутарстан Республикинчи заводра туса кăларнă техникăпа унти специалистсем ял хуçалăх предприятийĕнчи механизаторсене ĕçлеме вĕрентнĕ. Ял хуçалăх предприятийĕнче тыр-пул çапса тĕшĕлекен "АКРОС-540" комбайна та кăçал туяннă.
С.Архипова сăн ỹкерчĕкĕнче: "Победа" ООО директорĕ Николай Головин (сылтăмран пĕрремĕш) Владимир Козлов механизаторпа тата Анатолий Алексеев тĕп инженерпа пĕрле, çĕнĕ йышши техникăпа тухăçлă ĕçлеме май пулнипе кăмăллă пулнине пĕлтереççĕ.