05 февраля 2014 г.
Çар ретне тăрса çĕр-шыва хỹтĕлесси - чи таса та сăваплă тивĕç.
Районти чылай çемье ывăлĕсем тăракан çар чаçĕсен командованийĕсенчен Тав çырăвĕсем илнипе мăнаçланма пултараççĕ. Вĕсен шутĕнче - Çĕнĕ Арланкасси ялĕнче пурăнакан Леонид Николаевичпа Эльвира Валерьевна Михеевсем. Вĕсем Артем ывăлĕ Белгород хулинче тăракан çар чаçĕн командованийĕнчен Тав çырăвĕ илчĕç. Командир çырнă çырури сăмахсем ашшĕпе амăшĕшĕн пысăк савăнăç.
"Тавах сире ывăлăра тивĕçлĕ воспитани парса çитĕнтернĕшĕн. Артем таса та тỹрĕ чунлă пулнипе, дисциплинăна çирĕп пăхăннипе палăрса тăрать, шаннă хĕç-пăшалпа шанчăклăн тата пĕлсе усă курать, обществăлла ĕçе хастар хутшăнать. Служба тивĕçне чыслăн пурнăçланă май вăл командирсемпе юлташĕсен хисепне çĕнсе илчĕ".
Раççей спецназĕн çапăçури йăли-йĕркине пăхăнса пырса Артем икĕ Хисеп хутне тивĕçме ĕлкĕрнĕ те ĕнтĕ.
Служба срокĕ вĕçленсен те вăл контракт çырса пурнăçне çар ĕçĕпе çыхăнтарма кăмăлланă.
А.Михеев ачаранах спортпа туслă пулнă, йывăр атлетикăна кăмăлланă.
Е.ПЕТРОВА.
Сăн ỹкерчĕкре: А.Михеев.