16 декабря 2013 г.
14 декабря 2013 г.
Раштав уйăхĕн 27-мĕшĕнче Чăваш Ен тĕп хулинче Олимп çулăмĕн эстафети иртĕ. Эстафета кăнтăрла 12 сехетре чукун çул вокзалĕнче старт илĕ.
Олимп вăййисен тĕп символĕ хула урамĕсемпе (пурĕ 33 çухрăма яхăн) хĕмленсе "Олимпийский" стадионта çуталĕ. Унтах пысăк та савăнăçлă уяв кĕрлĕ. Хĕрлĕ лапам та чаплă концерта йыхравлĕ, сывă пурнăç йĕркине тытса пыракансем Хĕл мучипе зарядкăна тухĕç.
Олимп çулăмне вара 160 çынна йăтма шаннă. Вĕсен йышĕнче республикăри паллă спортсменсемпе тренерсене, общество хастарĕсемпе патшалăх службин ĕçченĕсене, ỹнер ăстисене, вĕрентекенсемпе студентсене курăпăр. Хăшĕ-пĕринпе паллаштарар-ха: РСФСР тава тивĕçлĕ тренерĕ Владимир Григорьев, хĕллехи Универсиада чемпионки Татьяна Моисеева, полици капитанĕ Светлана Ерпылева, Валерий Карпов артист, шкул олимпиадисен çĕнтерỹçи Кирилл Львов, Раççей чемпионки Кристина Савицкая, Паралимп вăййисене хутшăннă Юрий Ильин йĕлтерçĕ, XXIX Олимп вăййисен бронза призерĕ Владимир Андреев, ЧР физкультурăпа спорт тата туризм министрĕн çумĕ Сергей Шелтуков... Çавăн пекех эстафетăна Универсиада çулăмĕн эстафетинче опыт илнĕ 300 ытла волонтер хутшăнĕ.
Аса илтеретпĕр: Олимп вăййисем Сочире 2014 çулхи нарăсăн 7-23-мĕшĕсенче иртĕç.