16 ноября 2013 г.
16 ноября 2013 г.
Пирĕн ентеш - Питтепĕл ялĕнче çуралнă Николай Михайлович Балтаев тимĕр-тăмăртан тĕлĕнмелле тĕрлĕ медальсем, паллăсем тăвас енĕпе палăрнă ăста. Ытларахăшĕ ăна Палтай Микуç псевдонимпа пĕлеççĕ. Кунашкал ăстасем республикăра та сайра. Николай Михайлович чăннипех пултаруллă гравер. Вăл вăтам шкул хыççăн Павловри художествăпа ремесла училищинче пĕлỹ пухнă, ун хыççăн В.И.Мухина ячĕллĕ илемлĕхпе промышленноç аслă училищине вĕренсе пĕтернĕ. Чăваш патшалăх университетĕнче аслă преподавательте ĕçлекенскер тимĕр-тăмăртан вуншар медаль ăсталама пултарнă. Медальсен темисем ытларахăшĕ чăваш историйĕпе, тĕнĕпе çыхăннă. Унăн тĕп ĕçĕсем "Иакинф Бичурин", "Аттила-батр", "Çỹлти турă", "Чỹк уйăхĕ", "Сеспель" тата ытти те.
Н.Балтаев - чăн чăваш çынни. Вăл "аваллăхсăр пуласлăх çук" тĕллевпе пурăнать. Ахальтен мар пулĕ Николай Михайлович Аслă Таяпа ялĕ çывăхĕнчи хулаша упрас, ăна пулас ăрушăн сыхласа хăварас тесе тăрăшакансенчен пĕри. Вăл çак палăка йĕркене кĕртес, унăн аслă пĕлтерĕшне çĕнĕрен çĕклес тĕлĕшпе сахал мар ĕç туса ирттерчĕ. Палăка çĕнетмелли вун-вун эскиз-проект туса хатĕрлеме пултарчĕ. Унăн эскизĕпе Александр Алексеев (Сантăр Пикл) питех те хисеплĕ, пархатарлă ĕç пурнăçларĕ. Паянхи кун пулас ăрушăн асăнмалăх палăк мăнаçланса ларать унта. Унăн уççине те Палтай Микуçĕ туса хатĕрленĕ. Вăл Елчĕкри историпе тăван тавралăх халăх музейĕнче упранать.
Çак кунсенче Чăваш Республикин тава тивĕçлĕ художникĕ Николай Михайлович Балтаев хăйĕн çур ĕмĕрхи юбилейне паллă турĕ. Унăн малашлăхĕ тата çутă пултăр.
В.ВАСТУЛОВА, Елчĕкри историпе тăван тавралăх халăх музейĕн заведующийĕ.
Сăн ỹкерчĕкре: Н.Балтаев çамрăк ỹнерçĕпе.