16 ноября 2013 г.
16 ноября 2013 г.
Кĕрхи вăхăтра асфальтсăр урамсенче пылчăк çăрăлнă май автомашина хуçисем транспорт хатĕрĕсене тĕп çул хĕррине лартса хăвараççĕ. "Кукăр алăллисем" çакна кăна кĕтеççĕ тейĕн - автомашинăсем хуçасемсĕр юлнипе усă курса салонри тĕрлĕ хатĕрсене е документсене куç хываççĕ. Чылай чух хаклă япаласене йăкăртнипе анчах çырлахмаççĕ, "тимĕр утсене" вăрласа та каяççĕ.
2013 çулхи пуш уйăхĕн 17-мĕшĕнче ирхине 3 сехетре паллă мар çын Кивĕ Эйпеçри С. хуçалăхĕ умĕнчен "Ока" автомашинăна хускатса кайнă. Автомашина хуçи С. çăра уççине зажигани замокĕнчех хăварни преступникшăн питĕ меллĕ пулнă.
Полици ĕçченĕсем асăннă фактпа РФ УК 166 статйипе (1 пай) килĕшỹллĕн уголовнăй ĕç пуçарнă. Автомашинăна темиçе кунтан Патăрьелĕнчи пушă ларакан çурт умĕнче тупнă. Автомашина çĕмĕрĕлнĕрен преступник ăна пăрахса хăварнă та çухалнă. Полици пайĕн кашни службин ĕçченĕсен тăрăшулăхне пула преступника чылай вăхăт шыранă хыççăн тупса палăртнă. Вăл Патăрьел районĕн çынни - çул çитмен Ф. пулнă. Ф. Елчĕк районĕнче пурăнакан паллакан хĕр патне хăнана килнĕ.
Çакăн евĕр тепĕр тĕслĕх 2013 çулхи пуш уйăхĕн 24-мĕшĕнче пулса иртрĕ. Кармал ялĕнче паллă мар çын çĕрле Аттелĕхĕн Аслă вăрçинче пуçĕсене хунă салтаксене халалласа лартнă палăк умĕнче ларакан Ф.-ăн ВАЗ-2107 автомашинин алăкĕн çăрине çĕмĕрсе салона кĕнĕ, зажигани çăрине çĕмĕрсе тата проводсене туртса кăларса автомашинăна хускатма тăнă. Хытарса лартнăран руль пăрăнманни автомашинăна вăрласа каясран упраса хăварнă. Йĕрке хуралĕн ĕçченĕсем çак преступление те уçăмлатнă, преступнике тупса палăртнă.
Икĕ ĕçе те суда ярса панă. Суд айăпçăсене иккĕшне те медицина тĕлĕшĕнчи хистевлĕ мерăсемпе психиатрин пĕрлехи стационарĕнче сипленме йышăну кăларнă.
Çак тĕслĕхсене тĕпе хурса йĕрке хуралĕн ĕçченĕсем "тимĕр утсен" хуçисене кирек хăçан та тимлĕ пулма, автомашинăсене ятарлă сигнализацисемпе тивĕçтерме, вăрах вăхăта хăварнă чух салонри хаклă япаласене пĕрле илме, çăра уççине зажигани замокĕнче е салонра хăварасран асăрханма сĕнеççĕ.
Кун пек чухне пĕлĕшсенчен е çывăх çынсенчен транспорт хатĕрĕсене асăрхаса тăма ыйтмаллине те манар мар.
Н.СОСНОВ, ШĔМĕн муниципалитетсем хушшинчи "Комсомольский" уйрăмĕн Елчĕкри полици пайĕнчи следовательсен ушкăнĕн аслă следователĕ, юстици подполковникĕ.