16 ноября 2013 г.
16 ноября 2013 г.
Чỹк уйăхĕн 15-мĕшĕнчен табак туртассине хирĕç кĕрешмелли саккуна пăснăшăн çĕнĕ штрафсем вăя кĕчĕç. Реклама пирки калакан саккуна та улшăнусем кĕртнĕ - текех табака пачах та рекламăлама юрамасть.
Пирус туртнине сăнлакан мультфильмсемпе, киносемпе мĕн тумалли пирки чылай хушă тавлашнă хыççăн çакăн пек йышăннă: халĕччен тухнă фильмсем мĕнле пулнă, çаплипех юлаççĕ, çĕннисенче вара чарусем пулмалла. Малашне çĕнĕрен тухакан кино, радио, телефильмсенче тата ятарлă программăсенче чĕлĕм туртнине сăнлани тата табака рекламăлани пачах пулмалла мар. Çакна пăхăнман авторсене пысăк штраф кĕтет.
Çитĕннисем валли кăларакан фильмсемпе программăсенче те туртнине сăнлас енĕпе чарусем пур. Çапах та, калăпăр, фильмăн содержанийĕпе, шухăшĕпе пирус туртни, табака сăнлани кирлех пулсан, çакна тума юрать.
Обществăлла вырăнсенче туртнăшăн малашне 500-1000 тенкĕ штраф парĕç. Табак туртассине хирĕç кĕрешмелли саккуна пăсни ачасене пырса тивет пулсан вара явап тата пысăкланать. Çул çитмен çамрăка пирус сутнăшăн граждансене 3-5 пин тенкĕлĕх штрафлĕç, должноçри çынсене - 30-50 пин тенкĕлĕх, юридика сăпачĕсене - 100-150 пин тенкĕлĕх.
Ача-пăча площадкинче туртакансен 2-3 пин тенкĕ кăларса хума тивĕ. Аслă çулхи çын ачана сигарет сĕнсен ăна 2 пин тенке штрафлĕç.
Пĕр-пĕр организаци территорийĕнче "Туртма юрамасть" тесе çырса çакнă тăк, анчах та кунта çав-çавах кам та пулин туртсан, организаци ертỹçин штраф тỹлеме тивĕ. Ĕçпе тивĕçтерекенĕн çавăн пекех туртакансем валли ятарлă вырăн уйăрса хатĕрлемелле. Çапла тумасан ертỹçĕне каллех явап тыттарма пултараççĕ. Штрафсем пĕчĕк мар, çавăнпа туртас йăлана пĕтернинчен ырри нимĕн те çук.
И.ЖИРНОВА.