05 ноября 2013 г.
Юпа уйăхĕн 30-мĕшĕнче Мускавра Раççей Федераци Канашĕнче Чăваш Республикин кунĕсем иртнĕ май Чăваш Ен Пуçлăхĕ Михаил Игнатьев Федераци Канашĕн Председателĕпе Валентина Матвиенкăпа тĕл пулнă.
Калаçура Чăваш Енĕн социаллă пурнăçĕпе экономикин хальхи тăрăмне, Раççей парламенчĕн çỹлти палати республикăн саккун тата общество пуçарăвĕсене пулăшассин ыйтăвĕсене сỹтсе явнă.
Валентина Матвиенко Чăваш Ен хăйне федераци шайĕнче мĕнле паллаштарнине ырăпа хакланă, Федераци Канашĕнче Чăваш Республикин кунĕсем питĕ ăнăçлă иртнине тата лайăх кăмăл-туйăм çуратнине палăртнă. "Ку - республика çитĕнĕвĕсем пирки çеç мар, регионти йывăрлăхсем çинчен те каласа кăтартмалли мел. Çак информаци федераци субъекчĕсенчи лару-тăрăва тĕрĕс ăнланмашкăн, малашне ăнăçлă йышăнусем тумашкăн кирлĕ", - тенĕ Раççей Федераци Пухăвĕн çỹлти палатин спикерĕ. Вăл çавăн пекех Чăваш Енре нацисен тата конфессисен хушшинче килĕшỹлĕхпе çураçулăх хуçаланнине, ку опытпа ытти регионра та усă курмаллине пĕлтернĕ.
Михаил Игнатьев Валентина Матвиенкăна республикăна хăйĕн çитĕнĕвĕсем пирки Федераци Канашĕнче каласа кăтартма май панăшăн тав тунă. "Эсир хăвăр та кĕпĕрнаттăр пулнă, регион йывăрлăхĕсене лайăх ăнланатăр тата пире яланах пулăшатăр. Эпир çакна туятпăр", - палăртнă Михаил Игнатьев.
Унсăр пуçне вăл 2014 çулта Раççейре Культура çулталăкĕ пулĕ тесе пĕлтернине, çак утăма питĕ вăхăтлă тунине - тĕнчипех глобализаци вăй илсе пынă вăхăтра чун, ăс-хакăл, кăмăл-сипет пахалăхĕсене сыхласа хăварассин ыйтăвĕсем пушшех те çивĕч те пĕлтерĕшлĕ-çке - каланă.
х х х
РФ Федераци Пухăвĕн Федераци Канашĕнче Чăваш Енĕн презентаци-куравне официаллă майпа уçнă. Унта Федераци Канашĕн Председателĕ Валентина Матвиенко тата Чăваш Ен Пуçлăхĕ Михаил Игнатьев хутшăннă.
Федераци Канашĕн холĕнче Чăваш патшалăх филармонийĕн фольклорпа эстрада "Çавал" ансамблĕ - вăл халăх пултарулăхĕн йăли-йĕркине малалла тăсакансенчен пĕри - чăвашсен хăна юррине шăрантарнă.
Чăваш Республики икĕ блокран - презентаци стенчĕсенчен тата ỹнер экспозицийĕнчен - тăракан курав хатĕрленĕ. Чăваш Енĕн социаллă пурнăçпа экономика аталанăвĕн 8 çул-йĕрне кăтартнă: ЧР Патшалăх Канашĕн ĕçĕ-хĕлĕ, инвестици вăй-хăвачĕ, промышленноçри, ял хуçалăхĕнчи, сывлăх сыхлавĕнчи, социаллă политикăри, вĕрентỹри, физкультурăпа спортри çитĕнỹсем.
Çав кунах Раççей Федераци Пухăвĕн Федераци Канашĕнче Михаил Игнатьев "Федераци субъекчĕн сехетĕнче" тухса калаçнă. Хăйĕн сăмахĕнче вăл экономикăпа социаллă аталанăвĕн Стратегийĕн тĕп çул-йĕрĕсем çинче чарăнса тăнă.
Сенаторсем умĕнче çавăн пекех Чăваш Республикин Патшалăх Канашĕн Председателĕ Юрий Попов тухса калаçнă.
Федераци Канашĕн Председателĕ Валентина Матвиенко Раççей Федераци Канашĕнче Чăваш Республикин кунĕсене лайăх йĕркеленине, регион çинчен тулли информаци тăратнине палăртнă.
Юлашкинчен Михаил Игнатьев çĕр-шыври тата республикăри массăллă информаци хатĕрĕсенче ĕçлекен журналистсен ыйтăвĕсене хуравланă, "Вместе. РФ" телеканала кĕске интервью панă.
х х х
Раççей Федерацийĕн Канашĕнче Чăваш Республикин кунĕсене ирттерме хутшăннă республика делегацийĕн йышĕнче Елчĕк район администрацийĕн пуçлăхĕ Н.Миллин та пулнă. Вăл Мускавра ирттернĕ пур мероприятисене - РФ Федераци Канашĕн федераци йĕркелĕвĕ, регион политики, вырăнти хăй тытăмлăх тата Çурçĕр ĕçĕсен комитечĕн "Раççей Федерацийĕн регионĕсен федераци шайĕнчи юбилей кунĕсене хатĕрленсе ирттерес" ыйтупа йĕркеленĕ ларăва, Федераци Канашĕн "Федераци субъекчĕн сехечĕ" пленарлă ларăвне,Чăваш Енĕн презентаци-куравне хутшăннă.
Федераци Канашĕнче Чăваш Ен кунĕсенче Н. Миллина Раççей Федераци Пухăвĕн Федераци Канашĕн Хисеп грамотине парса чысланă.