Публикации » Ỹсĕмсем хавхалантараççĕ.

29 декабря 2012 г.

           Яланах малти ретре пулма хăнăхнă "Комбайн" ял хуçалăх производство кооперативĕн ĕçченĕсем черетлĕ çĕнĕ çулталăка та ĕçри çитĕнỹсемпе кĕтсе илчĕç. Усă куракан 100 гектар çĕр пуçне кунта 168 центнер аш-какай, 1108 центнер сĕт туса илнĕ. Уй-хирте те тухăçлă тыр-пул çитĕннĕ, ăна пĕтĕмпе 24740 центнер пухса кĕртнĕ, 1 гектартан тухакан вăтам тухăç 32 центнерпа танлашнă. Çĕртме сухи тăвассине те, кĕр тыррисене акассине те агротехника палăртнă вăхăтра пурнăçласа хăварнă. Çапла майпа кĕр тыррисене 600 гектар çинче акса хăварнă. Выльăх-чĕрлĕх фермисенче тăрăшакансем палăртнă тĕллевсене пурнăçлассишĕн ырми-канми тимленĕ. Кавалти Алексей Носов ертсе пыракан ĕне фермин коллективĕнче тăрăшакансем ырă сăмаха тивĕçлĕ. Кивĕ Эйпеçри сысна ферминче ĕçлекенсем те ỹсĕмсемпе савăнтараççĕ. Николай Сусметов заведующи палăртнă тăрăх, виçĕм çулхипе танлаштарсан, кунта сыснасен хисепĕ те, вĕсенчен продукци туса илесси те ỹснĕ. Хальхи вăхăтра хуçалăхра пикенсех çур акине хатĕрленеççĕ. Пĕтĕм вăрлăх акма юрăхлă кондицие тивĕçнĕ. Вăрлăх хатĕрлессипе ятарласа ĕçлекен ял хуçалăх предприятийĕ ăна çак вăхăтчен сахал мар сутнă та. Тĕрлĕ майсемпе усă курса ГСМ, удобрени кỹрсе килеççĕ. Ял хуçалăх техникине, тĕпрен илсен, кĕркуннех юсаса хатĕррисен ретне лартнă. Сăмах май, Çĕнĕ çулччен темиçе кун маларах çеç хуçалăхра "ACROS-530" йышши çĕнĕ комбайн та туянма пултарнă.

Источник: "Елчĕк Ен"