13 августа 2013 г.
Чăваш Республикинчи МВД пресс-служби юлашки вăхăтра телефон ултавçисем йышланни çинчен евитлет. Ултавçăсене пула темиçе çын шар курма ĕлкĕрнĕ те ĕнтĕ.
Тĕслĕхрен, Шупашкарта пурăнакан 30 çулхи хĕрарăмăн телефонĕ çине утă уйăхĕнче СМС-хыпар килнĕ. Унта хĕрарăм электрон карттине хупса лартни пирки пĕлтернĕ, карттăна çĕнĕрен уçма çырса панă абонент номерĕ çине 15 пин тенкĕ куçармалла-мĕн. Ăна-кăна чухламан хĕрарăм укçа куçарнă хыççăн тин хăйне улталанине ăнланса илет.
Ултавçăсен аллине çавăн пекех Çĕнĕ Шупашкарти 73 çулхи арçын та лекнĕ. Кăнтăрла ун патне палламан çын шăнкăравланă та ывăлĕ авари туни пирки пĕлтернĕ, ĕçе татса парас тесен терминал урлă 8 пин тенкĕ куçармалли мелне пĕлтернĕ. Пенсионер, çаксене ĕненсе, укçа куçарнă.
Икĕ хутчен те шăнкăравсем Самар тăрăхĕнчен килнине палăртнă полицейскисем. Лару-тăрăва уçăмлатакан материалсене унта ярса пама хатĕрлеççĕ.
Ултавçăсенчен хур курас мар тесен мĕн тумалла-ха?
Электрон карттăна хупнă текен СМС-хыпар илсен енчĕкри укçапа сыв пуллашма ан васкăр. Малтан телефон урлă банкпа çыхăнăр е унта ятарласа кайсах килĕр. Банк нихăçан та урăх счет çине укçа куçарма ыйтса СМС-хыпар ямасть. Çавăн пекех кун пирки полицине те систерĕр.
Сирĕн çывăх тăванăр авари тунă, уншăн уголовнăй ĕç пуçарас мар тесе çак самантрах укçа-тенкĕ кăларса хума ыйтаççĕ пулсан суя полицейские тепĕр хут шăнкăравлама ыйтăр. Хăвăр çав хушăра тăванăрпа çыхăнăр - лару-тăрăва уçăмлатăр. Унтан çийĕнчех 02 (кĕсье телефонĕпе - 020) номерпе полицине пĕлтерĕр.
Н.СОСНОВ.