20 июля 2013 г.
"Комбайн" ял хуçалăх производство кооперативĕнче тата "Эмметево" сахал яваплă юлташлăхра вырма ĕçĕсем ăнăçлă пыраççĕ. Вĕсен уй-хирĕсенче ĕç-хĕле мĕнле йĕркелесе пынипе эпир кăсăкланса паллашрăмăр. Çав кунхине "Эмметево" сахал яваплă юлташлăхри хирсене район администрацийĕн пуçлăхĕ Н.Миллин та çитсе курнă, çăкăр тăвакансемпе тĕл пулнă.
"Эмметево" сахал яваплă юлташлăхра харăсах тăватă комбайн (виççĕшĕ - "Енисей - 1200", тепри - кăçал анчах туяннă вĕр-çĕнĕ "АКРОС-530") тыр пул çапса тĕшĕлеççĕ. Константин Захаров, Анатолий Краснов, Вениамин Галкин, Венарий Захаров комбайнерсен тата вĕсен пулăшаканĕсен - Валерий Захаровпа Николай Галкинăн, Алексей Захаровпа Николай Захаровăн кăмăлĕсем уçă, вĕсем вырма ĕçĕ кал-кал пынипе хавхаланнă. "Уй-хир карапĕсем" пĕри тепринчен çĕнĕ, вĕсемпе чăрмавсăр ĕçлеме комбайнерсене вăй парса тăрать, тейĕн.
Хирĕсенче пулса курма питех те кăмăллă: çумăр çуса иртнĕ хыççăн сывлăш уçă та таса, ытла шăрăх та мар. Урпа, тулă анисем çинче çум курăк кураймăн - калчасем шăтса тухнă хыççăн çум курăксене хирĕç им-çам сапни каламасăрах паллă. Кăçалхи шăрăх çанталăк условийĕнче вĕсем кирлĕ пек ỹссе аталанайман пулин те пучахсене çапса тĕшĕлеме вăхăт çитнĕ - вĕсем çĕрелле усăннă. Ыраш ани те çум курăксăр, таса пулнăран унăн пĕтĕм лаптăкне тỹррĕн çапса тĕшĕленĕ. Ĕçе çакăн пек йĕркелени хаклă вăхăта, çунтармалли сĕрмелли материалсене перекетлеме май парать.
Федор Ивановпа Валерий Лапшин водительсем çапса тĕшĕленĕ тырра йĕтеме турттараççĕ. Кунта - хĕрỹ ĕç шавĕ. Тырра алласа сортланă çĕрте ытларах хĕрарăмсем, пенсионерсемпе шкул ачисем тăрăшаççĕ.
Ял хуçалăх предприятийĕнче, энергие перекетлекен, тухăçлă ĕçлекен техника хатĕрĕсемпе усă курнăран, тыр-пул çапса тĕшĕленипе пĕр вăхăтрах пĕр çул ỹсекен курăкран сенаж, утă хатĕрлеме те, улăма пресласа рулонсене хывма та, пушаннă лаптăксенче кĕрхи çĕртме тума та ĕлкĕреççĕ.
х х х
"Комбайн" ял хуçалăх производство кооперативĕнче пĕрчĕллĕ тата пăрçа йышши культурăсене 1009 гектар çинчен пухса кĕртмелле. Типĕ, шăрăх çанталăка пула ял хуçалăх культурисем 387 гектар çинче сиенленнине палăртнă, укçа çине куçарсан çак çухату 27 миллион тенке яхăн шутланать. Çакна ăнланса кунта ĕçлекенсем пурте, пĕр çын пек, уй-хирте çитĕннĕ мĕн пур пек пуянлăха вăхăтра тата тăкаксăр пухса кĕртме тĕллев илнĕ.
Ĕнерхи кун тĕлне ял хуçалăх предприятийĕнче пĕрчĕллĕ тата пăрçа йышши культурăсене 173 гектар çинче çулнă, 78 гектарне, пурĕ 1650 центнер, çапса тĕшĕленĕ. 1 гектартан тухакан вăтам тухăç 20 центнера яхăн.
Тыр-пула çапса тĕшĕлеме пурĕ 5 комбайн хутшăнать. Вĕсене Владимир Анисимов, Валерий Андреев, Леонид Сусметов, Вячеслав Капламов, Алексей Сусметов ĕçлеттереççĕ. Николай Алексеевич Головин, Алексей Васильев, Александр Никифоров комбайнсем патĕнчен йĕтеме тырă турттараççĕ. Геннадий Николаев - гараж заведующийĕ. Ĕçрен ỹркенмен арçын хĕрỹ вăхăтра автомашина рулĕ умне ларать, ячĕсене маларах асăннă водительсемпе пĕрле йĕтеме тырă турттарать.
"Комбайн" ял хуçалăх производство кооперативĕнче йĕтемсенчи ĕç технологине, ĕç условийĕсене лайăхлатассипе те курăмлă ĕç туса ирттернине палăртма кăмăллă. Кавал бригадинче ĕлĕкхи КЗС-10 йышши тырă аллакан агрегат вырăнне Б-1 ВЦС-50 ("Белогорье") установка вырнаçтарнă. Унпа усă курса пĕр харăсах 50 тонна тырă аллама пулать. Ку ĕçе пурнăçлама икĕ çын та ĕлкĕрмелле. Çĕнĕ установкăпа ĕçлеме Владимир Марковпа Павел Теллина çирĕплетнĕ.
Кивĕ Эйпеç бригадинчи йĕтемре ĕç çи пуçланиччен 1000 тăваткал метр асфальт сарса ĕлкĕртнĕ. Тырă алланă çĕрте аслисем ертсе пынипе шкул ачисемпе студентсем ĕçлеççĕ. Çапса тĕшĕленĕ лаптăксенче улăма пухса рулонсене хываççĕ. Çак ĕçе пурнăçлама Владислав Изратовпа Александр Павлов механизаторсене шаннă.
Пур ĕçе те вăхăтлă йĕркелесе пыма пĕлекен ял хуçалăх предприятийĕнче вырма пуçланиччен ĕне выльăхсене кĕркунне çитерме тесе 40 гектар рапс акса хăварнă.
Светлана АРХИПОВА.
Источник: "Елчĕк Ен"