08 июля 2013 г.
Аслă Пăла Тимешре Социализмла Ĕç Геройне Иван Алексеевич Михайловские асăнса çиччĕмĕш хут футбол турнирĕ иртнĕ.
Аслă Пăла Тимешре çуралса ỹснĕ, Ленин орденлĕ "Победа" колхозра комплекслă бригадăна ертсе пынă, пысăк тухăçлă ял хуçалăх культурисене ỹстернĕшĕн, выльăх-чĕрлĕх продукчĕсем туса илнĕшĕн Герой ятне, Ленин, Октябрьти Революци, Хисеп палли орденсене тивĕçнĕ, Чăваш АССРĕн, Елчĕк районĕн Ĕç Мухтавĕпе Паттăрлăхĕн кĕнекисене кĕртнĕ Иван Алексеевич Михайловские халăх асра тытать. Турнир пуçланас умĕн Аслă Пăла Тимеш ял тăрăхĕн пуçлăхĕ В.Рыбкин, "Комбайн" ЯХПК председателĕ Г.Федоров, район администрацийĕн ял хуçалăх пайĕн начальникĕ П.Тремасов И.Михайловскин ĕçри хастарлăхне, вăл ял хуçалăх культурисем, выльăх-чĕрлĕх продукчĕсем туса илессине комплекслă механизацилессипе районти пуçаруçă пулнине, коллектива ертсе пырассинче пултарулăх кăтартнине ырăпа аса илчĕç.
Кăçалхи турнира та хамăр районтан кăна мар, Вăрнартан, Шупашкартан командăсем килнĕ. Пĕтĕмпе 7 команда пуçтарăннă. Вĕсем малтанах икĕ ушкăна пайланса пĕр-пĕринпе вылярĕç. Пĕрремĕш çурма финалта Лаш Таяпа ялĕн тата федерацин наказани панине тĕрĕслесе тăракан республикăри управленийĕн (Шупашкар) командисем тĕл пулчĕç. Вăййăн тĕп вăхăчĕ çĕнтерỹçĕне палăртаймарĕ, пенальтие Шупашкар команди лайăхрах тапрĕ, финала тухрĕ. Иккĕмĕш çурма финалта Вăрнарти "Туслăх" тата Кавалти "Олимп" командăсем вылярĕç. 2:1 шутпа Кавалсем çĕнтерчĕç.
Финалта куçса çỹрекен кубокшăн федерацин наказани панине тĕрĕслесе тăракан команди "Олимп" командăпа тĕл пулчĕ. Кавал çамрăкĕсен команди хальхинче те вăйлăрах пулчĕ, куçса çỹрекен кубока çĕнсе илчĕ.
Турнирта виççĕмĕш вырăна Вăрнарти "Туслăх" команда йышăнчĕ, тăваттăмĕшĕ - Лаш Таяпа команди.
Вăйăсем вĕçленнĕ хыççăн чи лайăх вылякансене палăртрĕç: "Чи лайăх хỹтĕленсе вылякан" - С.Семенов (Шупашкар), "Чи лайăх вратарь" - Е.Ятманов (Вăрнар), "Чи лайăх çурма хỹтĕленсе вылякан" - Н.Егоров (Лаш Таяпа), "Чи лайăх тапăнса вылякан" - С.Васильев (Шупашкар), "Чи усăллă вăйăçă" - .Никифоров (Кавал).
Мала тухнă виçĕ командăна футбол мечĕкĕсем, вĕсен йышĕнче вылянă футболистсене пĕчĕк кубоксем, грамотăсемпе медальсем парса чыс турĕç.
Турнира йĕркелесе ирттерекенсем Иванпа Василий Михайловскисем ăмăрту спонсорĕсене тав тăваççĕ.
Н.АЛЕКСЕЕВ.
Источник: "Елчĕк Ен"