08 июля 2013 г.
2010 çулхи чăтма çук шăрăх çанталăкра акнă-лартнă ỹсен-тăран культурисем кирлĕ пек ỹссе аталанайманни, юхан шывсемпе кỹлĕсем, пусăсем типсе ларни паянхи пекех куç умĕнче. Кăçал та инкеклĕ çул пуласси паллă. Çу пуçланнăранпа та çĕре витермелле çумăр çуманран тыр-пул, выльăх апачлĕх культурăсем пулса çитеймесĕрех сархаяççĕ, типеççĕ. Çавна май çуртрисенчен тухăçлă тĕш тырă туса илесси çинчен шухăшламалли те çук. Пĕтĕм шанчăк - кĕр тыррисенче. Черетлĕ вырмара кĕрхи культурăсене районĕпе 4978 гектар çинчен пухса кĕртмелле.
Агротехника йĕркисене пăхăнса ĕçлекен ял хуçалăх предприятийĕсемпе хресчен (фермер) хуçалăхĕсенче кĕрхи культурăсенчен пысăк тухăç илеççĕ. Пирĕн районти тăпра пулăхне шута илсе специалистсем кĕр тыррисенчен типĕ çанталăк условийĕнче те 1 гектар пуçне шутласан вăтамран 20 центнертан кая мар тухăç илме пулнине палăртаççĕ. Кĕрхи культурăсем, çурхисемпе танлаштарсан, маларах та пулса çитеççĕ. Çапла майпа вĕсене чи малтан пухса кĕртме, малашнехи ĕçе хăвăртлатма пулать. Апла пулин те хăшĕ-пĕрисем, çĕре кирлĕ пек хатĕрлесе çитерейменрен, кĕр тыррисене кирлĕ таран лаптăкра акса хăварма шикленеççĕ. Пулас тыр-пул никĕсне хывса хăварассинче çине-çинех яланхи йăнăшсене тăваççĕ. Ыраша, кĕрхи тулла кирлĕ вăхăтра тата пысăк лаптăксенче акса хăварнă ял хуçалăх предприятийĕсенче кăçалхи лару-тăрура та ытларах тухăç алла илес шанăç пур. "Комбайн" ял хуçалăх производство кооперативĕнче, акă, кĕр тыррисене чи пысăк лаптăкра - 581 гектар (пĕрчĕллĕ тата пăрçа йышши культурăсен пĕтĕмĕшле лаптăкĕн 30 процентне йышăнать) çинче акса хăварнă. "Прогресс" акционерсен хупă обществинче унăн лаптăкĕ 560 гектар, "АСК-Яльчики" ОООра - 400 гектар, "Эмметево", "Яманчурино" ОООсенче 300-шер гектар шутланать. "Комбайн" ял хуçалăх производство кооперативĕнче кĕрхи культурăсен малашлăх сорчĕсене туса илесси çине пысăк тимлĕх уйăраççĕ. Маларах палăртнă 581 гектартан 220 гектарĕ шăпах çĕнĕ культура - кĕрхи тритикале шутланать. Вăл хĕл сиввисене чăтăмлăн тỹсме пултарать, пирĕн условисенче унран тулăран та ытларах тухăç илме май пур. Хальхи вăхăтра республикăри чылай ял хуçалăх предприятийĕнче асăннă культурăна çитĕнтерессипе тимлеççĕ. Пирĕн районти аграрисен мĕншĕн вĕсен тĕслĕхĕпе усă курмалла мар?
Светлана АРХИПОВА.
Источник: "Елчĕк Ен"