27 июня 2013 г.
Çĕртме уйăхĕн 20-мĕшĕнче регионсем хушшинчи "Регионсем - чикĕсĕр ĕçтешлĕх" курав ĕçлеме пуçланă. Унта Чăваш Енри тата Раççейĕн тĕрлĕ хулинчи предприяти-организаци хутшăннă. ЧР министерство-ведомстви те хăйсен экспозицийĕсемпе паллаштарнă. ЧР Информаци политикин министерстви IT-отраслĕн пысăк проекчĕсене, çавăн пекех Чăваш кĕнеке издательствин çĕнĕлĕхĕсене презентациленĕ.
Курав вăхăтĕнче кăмăл пуррисем пурте универсал электрон карттăна (УЭК) илмешкĕн ыйту çырма пултарнă. Вĕсен хăйпе пĕрле паспорт, патшалăх пенси страхованийĕн страховани свидетельстви (СНИЛС) тата обязательнăй медицина страхованийĕн полисĕ пулмалла.
Отрасль экспозицийĕпе Чăваш Ен Пуçлăхне Михаил Игнатьева информаци политикин министрĕ Валентина Андреева паллаштарнă (сăн ỹкерчĕкре). Михаил Васильевич УЭК илес тĕллевпе заявлени çыракансемпе кăсăкланнă. Медицинăн информаципе аналитика центрĕн специалисчĕсем çак процедура хăвăрт иртнине, çавăнпа никамăн та вăрах вăхăт кĕтмелле маррине çирĕплетнĕ. Сăмах май, УЭК илесси пирки заявлени пама 5-10 минут çеç кирлĕ. Михаил Игнатьев экспозиципе паллашнă чухне вырăнти предприниматель Евгений Айнур УЭК илес тĕллевпе ыйту çырнă. Çамрăк çын ку проектпа тахçанах кăсăкланма пуçланине, анчах ятарлă пункта каймашкăн ерçейменнине пĕлтернĕ. Паян вăл меллĕ саманта алăран вĕçертес темен, кураврах ыйту шăрçаланă. Тепĕр 20 ĕç кунĕнчен предприниматель çак карттăна алла илĕ. Палăртни вырăнлă: çĕртме уйăхĕн 20-мĕшĕ тĕлне республикăри 550 çын УЭКпа усă курма пуçланă, ăна илес тĕллевпе 1800-ĕн заявлени çырнă.
"Информаци обществи (2011-2020 çулсем)" патшалăх программипе килĕшỹллĕн Чăваш Енре темиçе проект пурнăçланать: патшалăх пулăшăвĕсене электрон мел çине куçарасси, влаç органĕсен ĕçне ведомствăсен хушшинчи электрон çыхăнăвăн тытăмĕнче (ВХЭÇТ) йĕркелесси. Паянхи кун Патшалăх пулăшăвĕсен пĕрлехи порталĕнче Чăваш Ен халăхĕ регионри патшалăх тата муниципалитет пулăшăвĕн 69 мелĕпе усă курма пултарать. Республикăра пурăнакансем проект пуçланнăранпа (2012 çулхи пуш уйăхĕ) 3900 электрон çыру янă. ЧР Юстици министерствин пулăшăвĕсем - чи анлă сарăлнисем. Ведомство адресĕпе 3300 заявлени килнĕ (пулăшу ĕçĕсемпе электрон мелпе усă курасси пирки), ку вăл - ĕтĕм запросăн 85%.
Ведомствăсен хушшинчи электрон çыхăнăвăн тытăмĕ патшалăх тата муниципалитет пулăшăвĕн 96 тĕсне панипе йĕркеленет. ВХЭÇТа ĕç тăвакан влаçăн 15 органĕ, 26 муниципалитет тата 291 ял тăрăхĕ хутшăнаççĕ. ЧР влаç органĕсем ВХЭÇТ урлă республика территорийĕнче ведомствăсен хушшинче 2 пин ытла запрос янă. Тата тепĕр 5 пин ыйту - едераци влаç органĕсен электрон сервисĕсене.
Министерство çавăн пекех цифра телекуравне Чăваш Ен территорийĕнче мĕнле ĕçе кĕртнине презентациленĕ. Республикăра цифра эфир телекуравĕпе 2014 çул вĕçнелле усă курма май пулĕ. Халĕ хатĕрленỹ ĕçĕсем пыраççĕ.
Курава килекенсем Чăваш кĕнеке издательствин çĕнĕлĕхĕсемпе те паллашма пултарнă. "Чăваш халăх юмахĕсем" кĕнеке, "Чувашская Республика. Приглашение к сотрудничеству" презентаци альбомĕн VIII кăларăмĕ нумайăшне кăсăклантарнă.