21 июня 2013 г.
Аслă Пăла Тимешри Портновсен ывăлĕ Андрей шкулта лайăх вĕреннĕ. Аттестат илсен Чăваш патшалăх университечĕн химипе технологи факультетне вĕренме кĕнĕ. Пилĕк çул вĕреннĕ хыççăн ăна çар ретне тăма повестка панă. Алла диплом илсе ĕлкĕриччен салтак атти тăхăннă пултаруллă каччă. Хальхи вăхăтра Екатеринбург хулинче çар службинче тăрать.
Андрей ачаран салтак пулма ĕмĕтленнĕ. Çар ретĕнче тăман арçын хисепре пулман уншăн. Ашшĕпе амăшĕ тĕпренчĕкĕ çĕр-шыва юрăхлă çын пулса ỹснĕшĕн савăнаççĕ. Ывăлĕ тăракан часть командованийĕ вĕсене ярса панă Тав çырăвне вуласан Портновсем савăнăç куççульне те пытарайман. Нумаях пулмасть Андрея кĕçĕн сержант звани панă.
Маттур та пысăк тавра курăмлă ывăлпа малашне те савăнмалла пултăр. Çар тивĕçне пурнăçланă хыççăн каччă хăй юратса вĕреннĕ профессипе ĕçе вырнаçасшăн.