11 октября 2012 г.
Юпа уйăхĕн 5-мĕшĕнче Елчĕкри культурăпа кану центрĕнче вĕренỹ ĕçĕнче пĕрремĕш утăмсем тума пуçăннă, çавăн пекех ĕмĕрне ачасене вĕрентес тата воспитани парас ĕçе панă учительсем хăйсен професси уявне анлă паллă турĕç. Педагогсене район администрацийĕн пуçлăхĕн пĕрремĕш çумĕ-вĕренỹпе çамрăксен политикин пайĕн ертỹçи Л.В.Левый саламларĕ. _ Паян чаплă уяв, награда памалли кун. Сирĕн ĕçсемпе савăнатăп. Кашни кунах эсир ачасен çиçекен куçĕсене куратăр, вĕсен чĕре таппине туятăр. Ачасене юратăр, вĕсем те сире юратĕç. Ачасене вĕрентнипе кăна мар, учителĕн хăйĕн те вĕренмелле, _ терĕ Леонард Васильевич. Вăл вун-вун çул çĕр-шывăн тивĕçлĕ гражданĕсен пĕр ăрăвне кăна мар вĕрентсе ỹстернĕ педагогика ĕçĕн ветеранĕсене (вун тăваттăн вĕсем) Тав çырăвĕсемпе чысларĕ. Вĕренỹ тытăмĕнче çак ырă йăлана юлашки çулсенче çирĕп тытса пыраççĕ, пенсионерсене пархатарлă ĕçшĕн сцена çине кăларса чыслани хăйне кура пысăк хисеп. ЧР вĕренỹпе çамрăксен политикин министрĕн çумĕ С.В.Петрова вĕрентекенсене уяв ячĕпе саламласа паян учитель профессине хисеплеме пуçланине, юлашки икĕ çул хушшинче вĕренỹ ĕçне лайăхлатас енĕпе нумай ĕç тунине, республикăра кăна шкулсене юсама, çĕнĕ ача сачĕсем тума 2 миллиард тенкĕ ытла укçа-тенкĕ уйăрнине палăртрĕ. Çавăн пекех вăл çак сферăна чунтан парăннисене, тăрăшуллисене наградăсемпе чысларĕ. ЧР Патшалăх Канашĕн Хисеп грамотине "Таябинка" ача сачĕн воспитателĕ Н.В.Козлова, Çирĕклĕ Шăхалĕнчи пĕтĕмĕшле пĕлỹ паракан вăтам шкулти Р.В.Коновалова социаллă педагог тивĕçрĕç. Сцена çине награда илме тухакансем йышлă пулнăран районти шкулсенче пултаруллă педагогсем сахал маррине курса савăнатăн. Чăваш Тăрăмĕнчи Г.И.Малова, Елчĕкри В.А.Николаев, Кушкăри Р.А.Портнов, Çĕнĕ Пăвари Л.Я.Пупина, Аслă Таяпари Г.А.Сядукова "Раççей Федерацийĕн пĕтĕмĕшле вĕрентĕвĕн хисеплĕ ĕçченĕ" хисеплĕ ята, Раççей Федерацийĕн Вĕренỹпе наука министерствин Хисеп грамотине Аслă Таяпари А.В.Адюкина, Кивĕ Эйпеçри Л.В.Алексеева, вĕренỹпе çамрăксен политикин пайĕн кадрсемпе ĕçлекен специалисчĕ В.Н.Немцева, Хăвăлçырмари А.В.Осипова, Шăмалакри З.В.Петрова, Курнавăшри С.Н.Прохорова, Çирĕклĕ Шăхалĕнчи В.О.Сазонов тивĕç пулчĕç. Çитĕнекен ăрăва воспитани парас ĕçре нумай çул тỹрĕ кăмăлпа вăй хунăшăн ЧР Вĕренỹпе çамрăксен политикин министерствин Хисеп грамотине тивĕçнисем: Шăмалакри М.В.Анисимова, Кивĕ Эйпеçри Т.П.Зайцева, Кушкăри С.С.Закиров, Çĕнĕ Пăвари Л.О.Кучакова, вĕренỹпе çамрăксен политикин пайĕн тĕп бухгалтерĕ И.В.Петрова, Патреккелти Т.В.Петрова, Тăрăмри О.Н.Тихонова. Раççей Федерацийĕн халăх вĕрентĕвĕпе наукăн профсоюз работникĕсен Чăваш рескомĕн Хисеп грамотине "Илемпи" ача сачĕн заведующине С.О.Кудряшовăна, вĕренỹпе çамрăксен политикин пайĕн бухгалтерне Н.А.Мешковăна пачĕç. Район администрацийĕн пуçлăхĕ Н.П.Миллин пухăннисене уявпа ăшшăн саламларĕ, учитель ĕçĕ сăваплине, Елчĕк ачисем Мускаври аслă шкулсене çулран-çул йышлăн вĕренме кĕнине палăртрĕ, çакăнта вĕрентекенсен тỹпи пысăкки çинче те чарăнса тăчĕ. Н.Миллин çамрăк ăрăва вĕрентес тата воспитани парас ĕçри хастарлăхшăн, общество ĕçне активлă хутшăннăшăн Елчĕкри искусство шкулĕнчи Л.И.Доброхотовăна, Шăмалакри В.А.Долговăна, Хăвăлçырмари Р.Р.Карсаковăна, Аслă Елчĕкри А.В.Мешковăна, Курнавăшри А.П.Смирнова район администрацийĕн Хисеп грамотине парса чыс турĕ. Район администрацийĕн вĕренỹпе çамрăксен политикин пайĕн Хисеп грамотисене те нумаййăн илчĕç. Хисеплисен йышĕнче вĕрентекенпе юнашар тренер та, рабочи те, библиотекарь та пулчĕ. Ĕçре палăрнисене чыс тунă вăхăтра Елчĕкри вăтам шкулта вĕренекенсем, Елчĕкри искуство шкулĕн преподавателĕсемпе ташă ăстисем хăйсен пултарулăхĕпе тыткăнларĕç. Уяв чаплă та янăравлă концертпа вĕçленчĕ. Районти педагогсене Алина Варна ачисемпе, Стас Владимиров, Александр Нефрит нихçан манса каймалла мар савăнăçлă самантсем парнелерĕç.
Источник: "Елчĕк Ен"