10 июля 2012 г.
Кушкăра çуралса ỹснĕ Валентина Николаевна Деомидова (Галошева) вăтăр çул ытла сывлăх хуралĕнче тăрăшать. Мĕн пĕчĕкрен тухтăр пулма ĕмĕтленнĕскер, халĕ вăл тĕп хулари клиника больницин тĕп врачĕн çумĕ, УЗИ, компьютерла томографипе ĕçлекен ăста специалист . Валентина Николаевна пуян опыт пухнă тухтăр. Медицина училищинче вĕреннĕ чухнех санитаркăра, университетра вĕреннĕ вăхăтра медицина сестринче ĕçлесе сиплев ĕçĕн вăрттăнлăхĕсене алла илнĕ. - УЗИ, компьютерла томографи медицинăри чăн пĕлтерĕшлĕ çĕнĕлĕхсем шутланаççĕ, - каласа кăтартать вăл. УЗИ - çын организмне сиенлемесĕр чир-чĕре тупма пулăшакан чи ансат мелсенчен пĕри. - Пĕррехинче, - аса илет Валентина Николаевна, - рентген кабинечĕ умĕнче тăракан хĕрарăм рентгенолога кĕтсе тăрать. Калаçса кайнă хыççăн хĕрарăмăн хулпуççи ыратни паллă пулчĕ. "Сикнĕ, е шăнăрĕ тăсăлнă ĕнтĕ", - тет хăй. Мĕнле ыратни çинчен ыйтса пĕлтĕм. "Сирĕн УЗИ тутармалла", - тетĕп. Аран ỹкĕте кĕртсе ăш-чиккине тĕрĕслерĕм - пыршăлăхра пысăк шыçă пурри палăрчĕ. Вăхăтра ĕлкĕртĕмĕр, хĕрарăма сыватма май килчĕ. - Тепрехинче 14 çулхи ачан апат хуранне 19 хут шланг ярса эндоскопи тунине пĕлтĕм. УЗИ-пе пăхнă хыççăн пỹринче шыçă пулни палăрчĕ, анчах кая юлнипе çамрăк пурнăçран уйрăлчĕ. Сывлăха вăхăтра тĕрĕслесе тăмалла, сипленмелле, _ канаш парать Валентина Николаевна. В.Н.Диомидова нумай ачаллă çемьере ỹснĕ. Мăшăрĕ çамрăкла вилнĕ пирки çичĕ ачине амăшĕ пĕччен çитĕнтернĕ, мĕн пĕчĕкрен тăрăшса вĕренме хистенĕ, ĕçлеме хăнăхтарнă. Халĕ Галошевсен çемйинче виçĕ врач, инженерсем, экономист _ пĕр тăвансем пурте лайăх паллăсемпе вĕренсе ăста специалистсем пулса тăчĕç. Валентина Николаевна, пур ĕçе те тĕплĕ тума хăнăхнăскер, шкулта та, училищĕре, университетра та "пиллĕк" паллăсемпе çеç вĕреннĕ. Халь вăл Чăваш Республикин тава тивĕçлĕ врачĕ, медицина наукисен докторĕ, профессор, кафедра заведующийĕ. Нумаях пулмасть В.Н.Деомидова Мускавран тĕнче симпозиумĕнчен таврăнчĕ. УЗИ, радиологи ыйтăвĕсемпе ирттернĕ канашлура наукăри çĕнĕлĕхсемпе паллашрĕ, хăйĕн çитĕнĕвĕсемпе паллаштарчĕ. Валентина Николаевнăпа унăн пациенчĕсем, ентешĕсем тивĕçлипе мухтанаççĕ, ăна нумай-нумай çул ĕçлеме, пурăнма ырлăх-сывлăх сунаççĕ.
Источник: "Елчĕк Ен"