10 июля 2012 г.
Аслă Пăла Тимеш ял тăрăхĕ ĕç паттăрĕсемпе пуян. Вĕсенчен пĕри - Аслă Пăла Тимешре çуралса ỹснĕ Иван Алексеевич Михайловский, "Победа" колхозри Иван Алексеевич ертсе пынă комплекслă бригада элита класлă сортлă тĕш тырă, ял хуçалăхĕн ытти продукчĕсене туса илессипе иртнĕ ĕмĕрĕн 60-мĕш çулĕсенче республикăра çеç мар, Совет Союзĕпе палăрнă. 1962 -1967 çулсенче кашни гектартан 32 центнер таран тĕш тырă, 320 центнер çĕр улми, 917 центнер выльăх кăшманĕ, 750 центнер таран кукурузăн ешĕл массине туса илнĕ. Вăл вăхăтра çак кăтартусем çĕр-шывра чи пысăккисем пулнă. Иван Алексеевич ертсе пынă Аслă Пăла Тимеш бригадипе пурте танлашма тăрăшнă. Ĕçри пысăк çитĕнỹсемшĕн ăна 1966 çулта Социализмла Ĕç Геройĕн ятне панă. Ытти наградăсен, ят-сумĕн хисепне асăнса пĕтерес çук. 1966 çулта ăна СССР Аслă Канашĕн депутачĕ пулма суйланă. Çак ĕçре вăл районăн, республикăн экономикăпа социаллă пурнăçне аталантарма хăйĕн тỹпине хывнă. Иван Алексеевич ĕçри пултарулăхне, паттăрлăхне вăл ĕçленĕ ялта пурăнакансем, тăван-пĕлĕшĕсем манмаççĕ. Ывăлĕсем - Иван Иванович тата Василий Иванович - ашшĕн ятне çỹлте тытма тăрăшаççĕ: пурнăçра, ĕçре тăрăшуллă, сăпайлă. Вĕсем ашшĕ ячĕпе çулсерен футбол турнирĕ йĕркелени те çакна çирĕплетет. И.А.Михайловские асăнса ирттерекен турнира кăçал та 8 команда пуçтарăнчĕ. Ăмăртăва хутшăнас кăмăллă командăсем ытлашшипех. Çакнашкал турнирсене ытти ял тăрăхĕсенче пурăнакансем те хăйсен пĕр-пĕр паллă ентешне асăнса йĕркелеме пултараççĕ. Иван Михайловские асăнса ирттернĕ турнира хутшăннă командăсем икĕ ушкăна тăватшар команда уйрăлса, пĕр-пĕринпе вылярĕç. Пĕрремĕш ушкăнри Кавалсем - пĕрремĕш, Лаш Таяпасем - иккĕмĕш вырăнсене йышăнчĕç. Иккĕмĕш ушкăнра Аслă Пăла Тимешри "Юман" спортклуб тата çак ялти ветерансен командисем малти икĕ вырăна тухрĕç. Пирвайхи тапхăрта Шупашкарти 4-мĕш юсав колонийĕн, Аслă Пăла Тимешри шкул ачисен, Патреккел, Кушкă ялĕсен командисем те вылярĕç. Çурма финалăн вăййисенче Кавал ялĕн команди ялти ветерансен командине, "Юман" спортклуб команди Лаш Таяпасене парăнтарчĕç. Çурма финал çĕнтерỹçисем - Кавалсем тата Аслă Пăла Тимешри "Юман" спортклуб команди финалта тĕл пулчĕç. Кĕрешỹ çивĕч иртрĕ, Кавалсем, 2:1 шутпа çĕнтерсе, турнир çĕнтерỹçисем пулса тăчĕç. Лаш Таяпа команди виççĕмĕш вырăншăн пынă тĕл пулура спорт ветеранĕсене çĕнтерчĕ. Турнир итогĕсемпе чи лайăх вылякансене палăртрĕç. "Чи лайăх вратарь" ята Лаш Таяпари А.Сорокин, "Чи лайăх хỹтĕленсе вылякан" ята Д.Михайловский ("Юман") тивĕçрĕç. "Чи лайăх çурма хỹтĕленсе вылякан" - И.Федоров (Кавал), "Чи лайăх тапăнса вылякан" - С.Васильев, "Чи лайăх бомбардир" - С.Иванов (Кавал). Мала тухнă 3 команда куçса çỹрекен кубоксене, Хисеп грамотисене, парнесене тивĕçнĕ. Михайловскисен çемйи турнира ирттерме пулăшнă спонсорсене чĕререн тав тăвать.
Источник: "Елчĕк Ен"